बेळगाव लाईव्ह : बेळगावच्या माजी नगरसेवक संघटनेने मनपा आयुक्त शुभा बी. यांची भेट घेऊन महत्वपूर्ण विषयांवर चर्चा केली.
या बैठकीत २४ तास पाणी पुरवठा, मालमत्ता कर भरण्याबाबत असलेल्या गोंधळावर चर्चा तसेच ई अस्थी संदर्भात नागरिकांना येणाऱ्या अडचणी तसेच, हिडकल डॅममधून उद्योग क्षेत्राला पाणी पुरवठ्याचा मुद्दा याबाबत चर्चा करण्यात आली.
बेळगाव शहराला २००६ पासून हिडकल डॅममधून २४ तास पाणी पुरवठा केला जात होता. मात्र, एल अँड टी कंपनीने पाणी पुरवठ्याची जबाबदारी घेतल्यापासून, पाणी पुरवठा नियमित नाही.
आता सात-आठ दिवसांनी पाणी पुरवठा होतो. २०३१ पर्यंत शहराची लोकसंख्या १२ लाख होण्याची शक्यता आहे, आणि त्यानुसार २४ तास पाणी पुरवठा सुनिश्चित करण्यासाठी उपाय योजना करणे आवश्यक आहे, अशी मागणी माजी आमदार रमेश कुडची यांनी केली.
तसेच माजी महापौर शिवाजी सुंठकर बोलताना म्हणाले, बेळगावमध्ये आधीच पाणी पुरवठ्याची समस्या आहे, अशा परिस्थितीत हिडकल डॅममधून हुबळी-धारवाडला पाणी पुरवठा करणे योग्य नाही, एल. अँड टी कंपनीच्या कारभारावर देखील ताशेरे ओढत बेळगावकरांना सुरळीत पाणी पुरवठ्यासाठी योग्य उपाययोजना करण्यात याव्यात, असे त्यांनी सांगितले.
तसेच माजी नगरसेवक रणजीत चव्हाण पाटील यांनी महापालिकेतील आस्थीकर कर भरण्याच्या समस्यांवर मुद्दा उपस्थित करत संबंधित गोंधळ दूर करण्याचे सुचवले.
यावर आयुक्त शुभा बी. यांनी यावर सकारात्मक प्रतिसाद देत शहराच्या विकासासाठी माजी नगरसेवकांचे मार्गदर्शन निश्चितच मोलाचे असून सदर समस्या सोडविण्यासाठी वॉट्सअप ग्रुप तयार केला जाईल असे सांगितले.
या बैठकीत माजी महापौर मालोजी अष्टेकर, वंदना बेळगुंदकर, दीपक वाघेला, सरीता पाटील, रेणु किल्लेकर, एन. बी. निर्वाणी, जयश्री माळगी, रणजीत चव्हाण-पाटील, विनायक गुंजटकर, मोहम्मद रोशन पिरजादे यासह अनेक माजी नगरसेवक उपस्थित होते.
