बेळगाव लाईव्ह : उत्तर प्रदेशातील प्रयागराज येथे कुंभमेळा दरम्यान झालेल्या चेंगराचेंगरीत बेळगावच्या चार भाविकांचा दुर्दैवी मृत्यू झाल्या नंतर बेळगाव जिल्हा प्रशासनाने मृतदेह आणण्यासाठी प्रयत्न चालवले आहेत.
प्रयागराज मध्ये झालेल्या दुर्घटनेतील मृतदेहांना बेळगावला आणण्यासाठी विशेष टीमची नियुक्ती करण्यात आली असून त्यांना प्रयागराजला रवाना करण्यात आले आहे.गुरुवारी दुपारी पर्यंत मृतदेह बेळगावला आणण्याचे प्रयत्न करण्यात येत आहेत अशी माहिती जिल्हाधिकारी मोहम्मद रोशन यांनी दिली आहे.
विशेष जिल्हाधिकारी हर्ष शेट्टी आणि अतिरिक्त पोलीस अधीक्षक श्रुती यांना प्रयागराज ला रवाना करण्यात आले असून कुंभमेळ्यात अडकलेल्यांना सुखरूप बाहेर काढण्याची जबाबदारीही देण्यात आली आहे याशिवाय मृतदेहांना बेळगावला आणण्याची जबाबदारी देण्यात आली आहे.
मयत झालेल्या चारही मृतदेहांना प्रयागराज येथून दिल्लीपर्यंत ॲम्बुलन्स च्या माध्यमातून आणण्यात येणार असून दिल्लीहून बेळगाव पर्यंत विमानाने आणले जाणार आहे अशी ही माहिती रोशन यांनी दिली आहे.
कुंभमेळ्यात जखमी झालेल्या बेळगावच्या भाविकांना प्रयागराज येथे उपचार उपलब्ध करून देण्याची जबाबदारी विशेष टीम कडे देण्यात आली आहे असेही त्यांनी नमूद केले. या घटनेत किती जखमी झाले याचे विवरण जिल्हा प्रशासन घेत आहे असे त्यांनी म्हटले आहे.
