बेळगाव लाईव्ह : कर्नाटक लोकायुक्त पोलीसांनी राज्यभरातील आठ सरकारी अधिकाऱ्यांच्या अवाजवी संपत्ती प्रकरणांतर्गत एकाच दिवशी 38 ठिकाणी एकत्रित छापे टाकले. या तपासणीत मोठ्या प्रमाणावर मालमत्ता आणि आर्थिक साधने सापडली आहेत.
कर्नाटक राज्यात ८ सरकारी अधिकाऱ्यांविरुद्ध नोंदवलेल्या बेकायदेशीर मालमत्ता प्रकरणांवर कारवाई करताना कर्नाटक लोकायुक्त पोलीस विभागाने ८ जानेवारी २०२५ रोजी एकाच वेळी राज्यभरात छापे टाकले. बंगळुरू, चिक्कमगळूर, बीदर, बेळगाव, तुमकूर, गदग, बळ्ळारी आणि रायचूर या जिल्ह्यांतील लोकायुक्त पोलीस स्थानकांमध्ये नोंदवलेल्या प्रकरणांमध्ये संबंधित सरकारी अधिकाऱ्यांच्या निवासस्थानी, कार्यालयांमध्ये आणि त्यांच्या नातेवाईकांच्या ठिकाणी छापे टाकण्यात आले.
या कारवाईदरम्यान सुमारे ३८ ठिकाणी शोधमोहीम राबवण्यात आली. यामध्ये बेळगाव जिल्ह्यातील खानापूर तालुक्यातील तहसीलदार प्रकाश श्रीधर गायकवाड यांच्या आठ ठिकाणी छापे टाकण्यात आले. त्यांच्या नावे २ जागा, ३ घरे, २८ एकर शेती जमीन आणि इतर जंगम मालमत्तेसह ४,४१,१२,५८५ रुपयांची संपत्ती नोंदवण्यात आली.
बंगळुरू येथील वाहतूक विभागाच्या सहआयुक्त श्रीमती एम. शोभा यांच्या सहा ठिकाणी छापे टाकण्यात आले. या छाप्यांमध्ये त्यांच्याकडे १ जागा, १ घर, २१ एकर शेती जमीन यासह स्थावर मालमत्तेची सुमारे ४५,३६,००० रुपये इतकी नोंद झाली. तसेच रोख रक्कम, दागिने, वाहने, बँक ठेव आणि घरगुती साहित्य यासह त्यांच्याकडे २,६३,८५,३०० रुपयांची जंगम मालमत्ता असल्याचे समोर आले. चिक्कमगळूरमधील कडूर तालुक्यातील तालुका आरोग्य अधिकारी एस. एन. उमेश यांच्या दोन ठिकाणी छापे टाकण्यात आले. त्यांच्याकडे २ जागा, १ घर, ८ एकर शेती जमीन आणि इतर जंगम मालमत्तेसह १,२५,१९,४३० रुपयांची मालमत्ता असल्याचे आढळले. बिदर जिल्ह्यातील सवकल्याण येथील लघु सिंचन आणि भूजल विकास विभागाचे सहाय्यक अभियंता रवींद्र मेट्रे यांच्या पाच ठिकाणी छापे टाकण्यात आले. त्यांच्याकडे ५ जागा, २ घरे, ७ एकर शेती जमीन यासह २,२५,६४,२७५ रुपयांची मालमत्ता असल्याचे स्पष्ट झाले.
तुमकूर जिल्ह्यातील येलहंका येथील प्रादेशिक परिवहन अधिकारी (निवृत्त) एस. राजू यांच्या पाच ठिकाणी छापे टाकण्यात आले. त्यांच्या नावावर १ जागा, २ घरे, ४ एकर शेती जमीन आणि इतर मालमत्तेसह ५,०२,४५,९३५ रुपयांची मालमत्ता असल्याचे समोर आले. गदग येथील नगरपालिका अभियंता हुच्चप्पा ए. बांडीवड्डर यांच्या पाच ठिकाणी छापे टाकण्यात आले. त्यांच्याकडे १ जागा, २ घरे, १ शॉपिंग कॉम्प्लेक्स आणि इतर मालमत्तेसह १,५८,९६,४३८ रुपयांची मालमत्ता असल्याचे उघड झाले.
बळ्ळारी जिल्ह्यातील मागासवर्गीय कल्याण विभागाचे अधिकारी आर. एच. लोकेश यांच्या पाच ठिकाणी छापे टाकण्यात आले. त्यांच्या नावे २ जागा, १ घर, ६ एकर शेती जमीन आणि इतर मालमत्तेसह २,०३,८७,२८२ रुपयांची मालमत्ता नोंदवण्यात आली. रायचूर जिल्ह्यातील जीईएससीओएमचे कनिष्ठ अभियंता हुलिराज उर्फ हुलुगप्पा यांच्या दोन ठिकाणी छापे टाकण्यात आले. त्यांच्याकडे ३ जागा, २ घरे, २४ एकर शेती जमीन आणि इतर जंगम मालमत्तेसह १,३८,६८,५०० रुपयांची संपत्ती असल्याचे आढळले.
या छाप्यांमध्ये मिळालेली मालमत्ता बेकायदेशीररीत्या संपादित केल्याचे स्पष्ट झाले आहे. या संदर्भात पुढील चौकशी सुरू असून कर्नाटक लोकायुक्त पोलीस विभागाने या प्रकरणांना पुढील गती दिली आहे.
