बेळगाव लाईव्ह:वाहतूक कोंडी नियंत्रित करण्याबरोबरच बाजारपेठेतील मार्ग सुलभ करण्याच्या उद्देशाने बेळगाव रहदारी पोलिसांकडून आज मंगळवारी मध्यवर्ती बसस्थानक ते खडेबाजार रस्त्यावर अतिक्रमण हटाव मोहीम राबविण्यात आली. तसेच रस्त्यावर अतिक्रमण करणाऱ्यांना कारवाईचा इशारा देण्यात आला.
बेळगाव शहराची व्याप्ती दिवसेंदिवस वाढत असून तीन राज्यांना जोडणाऱ्या या शहरात दररोज हजारो लोकांची ये-जा सुरू असते. यात भर म्हणून खडेबाजार सारख्या मार्गांवर दुकानदार आणि किरकोळ विक्रेत्यांकडून रस्त्यावर अतिक्रमण केले जाते.
परिणामी रहदारीस अडथळा निर्माण होऊन बऱ्याचदा वाहतूक कोंडीची समस्या निर्माण होत असते. याची गांभीर्याने दखल घेत वाहतूक कोंडी नियंत्रणात आणण्यासाठी बेळगाव रहदारी पोलीस विभाग आज ॲक्शन मोडवर आलेला पहावयास मिळाला.
रहदारी विभागाचे एसीपी जी.आर. निकम व सीपीआय श्रीकांत राठोड यांच्या नेतृत्वाखाली आज मंगळवारी शहरातील मध्यवर्ती बसस्थानकापासून खडेबाजार मुख्य रस्त्यावरील अतिक्रमणे हटविण्यात आली.
तसेच फूटपाथ आणि रस्त्यावर अतिक्रमण करणाऱ्या दुकानदार आणि किरकोळ विक्रेत्यांना सक्त ताकीद देण्यात आली. रहदारी पोलिसांनी हाती घेतलेली ही अतिक्रमण हटाव मोहीम साऱ्यांचे लक्ष वेधून घेत होती. त्याचप्रमाणे अतिक्रमण हटल्यामुळे खडेबाजार रस्ता मोकळा श्वास घेणार असल्याने सर्वसामान्य वाहनचालक आणि पादचाऱ्यांमध्ये समाधान व्यक्त होत होते.
