बेळगाव लाईव्ह: “दुर्दैवाने जग आज संकटाच्या कठड्यावर उभे आहे. जपान सह अनेक देशांची लोकसंख्या वेगाने घटत आहे. लक्षद्वीप सारखी राष्ट्र काही वर्षांनी राहणारच नाहीत अशी परिस्थिती निर्माण झाली आहे” असे विचार ज्येष्ठ साहित्यिक डॉ. ज्ञानेश्वर मुळे यांनी बोलताना व्यक्त केले.” लाईफ इज वन ,मेक इट क्रिएटिव्ह” या विषयावर सरस्वती वाचनालय शहापूर येथे मंगळवारी सायंकाळी बोलताना त्यांनी वरील विचार व्यक्त केले.
ते पुढे म्हणाले की,’ काही साहित्यिकांनी मांडलेले विचार आजकाल खरे वाटतात. “21 व्या शतकातील 21 धडे” या पुस्तकात एक लेखक म्हणतो की प्रगतीमुळे जगातील मोठा वर्ग निकामी वर्ग झाला आहे ज्याकडे काम नाही, उद्योग नाही . उपलब्ध स्क्रीन आणि स्वस्तात मिळणारी ड्रग्स यामुळे तरुण पिढी बरबाद होत चालली आहे.
.जगातील 90% संपत्ती ही केवळ दहा टक्के लोकांकडे आहे तर दहा टक्के संपत्ती ही 90% लोकांकडे आहे. ही विदारक परिस्थिती असून राजकारण गमतीच्या पलीकडे गेलेले आहे. वातावरण गंभीर व वाईट झालेले आहे. असेही ते म्हणाले.
बेळगावच्या सीमा प्रश्न बाबत बोलताना ते म्हणाले की, जनतेने सीमा प्रश्न कसा सोडवावा यावर एक पर्याय आहे तो म्हणजे एकमेकांनी एकमेकांच्या भाषा शिकायला हव्यात. जेव्हा सांस्कृतिक सुसंवाद होईल तेव्हा वाद गळून पडतील. जगामध्ये जे बिघडत चालले आहे त्याचे कारण सांस्कृतिक व शैक्षणिक मार्गदर्शनाचा अभाव हे आहे” असेही ते म्हणाले.
आपल्या यशाची सुरुवात झाली त्याचे अधिष्ठान बेळगाव आहे असे सांगून बेळगावमधल्या आपल्या अनेक आठवणी त्यांनी सांगितल्या.आपले गाजलेले पुस्तक “माती, पंख आणि आकाश” याचासुद्धा प्रकाशन सोहळा बेळगावतच कडोलीच्या साहित्य संमेलनात झाला होता अशी आठवण त्यांनी सांगितली. याचबरोबर बेळगावच्या साहित्य परंपरेशी आपली नाळ कशी जुळली आहे याची माहिती त्यांनी दिली. त्यांच्या हस्ते दीप प्रज्वलन करून आणि सरस्वती पूजन करून कार्यक्रमाची सुरुवात झाली. रुचिरा नातू हिने इसस्तवन व स्वागत गीत सादर केले .
वाचनालयाच्या अध्यक्षा प्रा स्वरूपा इनामदार यांनी त्यांचे स्वागत केले आणि त्यांचा सन्मान केला . पत्रकार मनीषा सुभेदार यांनी त्यांचा परिचय करून दिला. त्यांच्या दीड तासाच्या भाषणात त्यांनी अनेक अनुभव कथन करून उपस्थितांना मंत्रमुग्ध केले. व्यासपीठावर कार्याध्यक्ष सुहास सांगलीकर, डॉ. दत्तप्रसाद गिझरे आदी उपस्थित होते
