बेळगाव लाईव्ह :व्यापाऱ्यांसाठी ऑनलाइन व्यापारी परवाना, व्यापार व उद्योगाला चालना देण्यासाठी कार्यक्रमांचे आयोजन, महिलांसाठी सार्वजनिक शौचालये, प्रीपेड रिक्षा बूथ, शटल मिनी बस सेवा, वाहन पार्किंग आदिंसंदर्भात शहरातील नागरिक आणि समाजाच्या हितासाठी झटणाऱ्या बेळगाव सिटीझन्स कौन्सिलतर्फे शहर हितार्थ आज महापालिका आयुक्त शुभा बी. यांना निवेदन सादर करण्यात आले.
सिटीझन्स कौन्सिलचे अध्यक्ष सतीश तेंडुलकर चेंबर ऑफ कॉमर्सचे माजी अध्यक्ष विकास कलघटगी यांचा समावेश असलेल्या शिष्टमंडळाने उपरोक्त मागणीची निवेदन आज महापालिका आयुक्त शुभा बी. यांना सादर केले. निवेदनाचा स्वीकार करून आयुक्तांनी त्यातील सूचनांचा सहानुभूतीपूर्वक विचार केला जाईल असे आश्वासन दिले. कर्नाटकच्या वायव्य भागात महाराष्ट्र आणि गोवा राज्यांच्या सीमारेषा असलेल्या बेळगाव शहराला कर्नाटक सरकारने आपली दुसरी राजधानी म्हणून घोषित केले आहे.
बेळगाव जरी राज्यातील दुसऱ्या क्रमांकाचे सर्वात मोठे निर्यात करणारे शहर असले तरी गेल्या कांही वर्षांमध्ये शेजारील शहरांच्या तुलनेत या शहराचा विकास म्हणावा तितका झालेला नाही. किमान आवश्यक पायाभूत सुविधांद्वारे समर्थित बेळगाव शहराचा स्थिर विकास सुनिश्चित करण्यासाठी खालील कांही बाबी आम्ही तुमच्या निदर्शनास आणून देत आहोत. व्यापार परवाना : व्यापारी परवाने हे कोणत्याही शहर महापालिकेसाठी उत्पन्नाचे प्रमुख स्त्रोत असतात. कांही वर्षांपूर्वी ते ऑनलाइन उपलब्ध करून देण्यात आले होते. परंतु दुर्दैवाने ते अल्पकाळ टिकले आणि संबंधित पोर्टल आता सेवाबाह्य आहे.
ते पुन्हा सेवेत आणल्यास महसूल निश्चितपणे वाढेल. त्याचप्रमाणे व्यापाऱ्यांना ऑनलाइन व्यापारी परवाना मिळण्यासंदर्भात शिक्षित करण्यासाठी जास्तीत जास्त जागरुकता निर्माण केली जावी. ज्यामुळे आमच्या महसूल महसूल मिळेल आणि व्यापारी देखील त्रासमुक्त होतील. बेळगावच्या वेगळेपणावर प्रकाश टाकणारा चैतन्यमय मेळावा : आजकाल अनेक महानगरपालिका आपल्या शहराला प्रसिद्ध करण्यासाठी आणि व्यापार, वाणिज्य आणि उद्योगाला चालना देण्याकरिता सिटी प्रमोशन इव्हेंट्स घेत आहेत. त्याच धर्तीवर बेळगावच्या वेगळेपणाला चालना देण्यासाठी आणि आमच्या प्रदेशातील व्यापार, वाणिज्य आणि उद्योगाला चालना मेळावे -कार्यक्रम दरवर्षी आयोजित केले जावेत.
महानगरपालिका हेल्पलाईन क्रमांक : नागरिकांच्या सर्व तक्रारींसाठी एकच हेल्पलाईन क्रमांक उपलब्ध करून दिला जावा. स्मार्टसिटी कंट्रोल सेंटरमध्ये एक नियुक्त मनपा अधिकारी असावा जो एका नंबरवर किंवा ईमेल किंवा व्हाट्सअप/फेसबुकवर 24 तास सर्व प्रकारच्या तक्रारींची दखल घेईल. शहरातील सार्वजनिक शौचालये : शहराच्या मुख्य भागात खासकरून महिलांसाठी सार्वजनिक शौचालये नसल्यामुळे दैनंदिन शहरात येणाऱ्या महिलांची खूप गैरसोय होते. या समस्येवर लवकरात लवकर मात करण्यासाठी विस्तृत क्षेत्रनिहाय सर्वेक्षण केले जावे. अलीकडेच एका स्वयंसेवी संस्थेने पिंक टॉयलेट प्रकल्प सुरू केला होता पण तो पुन्हा अल्पकाळ टिकला. त्याच धर्तीवर शहर महानगरपालिकेने बाजारपेठेत आणखी पिंक टॉयलेट सुरू केले करावेत.
प्रीपेड ऑटोरिक्षा बूथ : आजकाल शेजारील शहरांमध्ये किंवा राज्यांमध्ये बहुतांश महापालिकांनी सामान्यपणे शहरातील प्रमुख वर्दळीच्या ठिकाणी प्रीपेड ऑटोरिक्षा बूथ सुरू केले आहेत. दुर्दैवाने आपल्या शहरात सध्या एकही बूथ कार्यरत नाही. याची दखल घेऊन मध्यवर्ती बस स्थानक, चन्नम्मा सर्कल सर्कल, धर्मवीर संभाजी महाराज सर्कल, रेल्वे स्थानक, गोववेस सर्कल, नाथ पै सर्कल शहापूर/वडगाव वगैरे ठिकाणी प्रीपेड ऑटोरिक्षा बूथ सुरू करावेत. बाजार परिसरात शटल मिनी बस सेवा : गेल्या 27 वर्षात बेळगाव बाजारपेठ परिसराने दोनदा मास्टर प्लॅन अनुभवला असून रस्ते रुंद केले आहेत. कांही दिवसांपूर्वी मुख्यमंत्री आणि परिवहन मंत्री यांनीही अरुंद मार्गावरील प्रवाशांसाठी छोट्या शटल बसेसची संख्या आणि त्यांची वारंवारता वाढविण्याच्या सूचना केल्या आहेत. तेंव्हा परिवहन मंडळाच्या सहकार्याने नागरिकांच्या सोयीसाठी बाजारपेठेत शटल मिनी बस सेवा सुरू करण्यात यावी. पिण्याच्या पाण्याची विक्री मशिन : शहरातील वर्दळीच्या आणि बाजारपेठेत नागरिकांची स्वच्छता आणि आरोग्य राखण्यासाठी शुद्ध पिण्याच्या पाण्याची व्हेंडिंग मशीन उपलब्ध करून देण्यात यावी. सध्याची पिण्याच्या पाण्याची व्यवस्था दयनीय स्थितीत असून त्याकडे त्वरित लक्ष देण्याची गरज आहे.
पार्किंग झोन : सध्या नागरिकांकडून बेशिस्त व चुकीच्या पार्किंगमुळे त्यांच्या वाहनांना दंड व दंड आकारला जात आहे. शहरात फक्त एकच पार्किंग लॉट आहे, ज्यामध्ये पार्किंगची जागा फारच कमी आहे. बहुस्तरीय पार्किंगची जागा खूप पूर्वी प्रस्तावित आहे आणि कोनशिलेचे दगडही टाकण्यात आले आहेत, पण प्रत्यक्षात काहीच झालेले नाही. सध्याच्या रहदारीच्या परिस्थितीत वाहन पार्किंगची समस्या निकालात काढण्यासाठी किमान 4 बहुस्तरीय पार्किंग संकुल युद्धपातळीवर बांधली जावीत. याखेरीज शहरातील महिला आणि ज्येष्ठ नागरिकांसाठी असलेल्या खास आणि सुरक्षित वॉकर झोन प्रमाणे महापालिकेने शहराच्या विस्तारित प्रदेशात वॉकर झोन निर्माण करावेत. त्या व्यतिरिक्त शहरातील व्यावसायिक आणि निवासी संवेदनशील भागात सीसीटीव्ही कॅमेरे बसवावेत. त्यामुळे शहरातील गुन्हेगारीला निश्चितच आळा बसेल. त्याचप्रमाणे बेसुमार वृक्षतोड थांबून हरित शहर प्रकल्पाची अंमलबजावणी केली जावी.
अस्तित्वात असलेली मोठी झाडे हेरिटेज ट्री टॅग बनवून त्यांचे जतन करावे. रस्ते बांधताना मध्यम आकाराच्या झाडांसाठी जागा ठेवावी. जी काही झाडे गेली आहेत त्याची भरपाई करण्यासाठी रस्त्याच्या कडेला तसेच संस्थात्मक आणि औद्योगिक कंपाऊंडमध्ये अधिकाधिक झाडे लावावीत. झाडे लावणे आणि त्यांची देखभाल करणे यासाठी लोक आणि संस्था यांचा सहभाग घ्यावा. सार्वजनिक तक्रार कक्ष : चांगले प्रशासन आणण्यासाठी प्रभागनिहाय सार्वजनिक तक्रार कक्ष सुरू करावेत. मंगळुरू सारख्या शहरात प्रभागनिहाय कमिटी हे अलीकडचे यश आहे. तेच मॉडेल बेळगावातही राबवले जावे, या पद्धतीने सिटीझन्स कौन्सिलतर्फे निवेदनाद्वारे महापालिका आयुक्तांसमोर सूचना मांडण्यात आल्या आहेत.
