बेळगाव लाईव्ह : मौनी अमावस्या निमित्त कुंभमेळ्यातील झालेल्या चेंगराचेंगरीत बेळगावच्या चार भाविकांचा मृत्यू झालेली घटना ताजी असतानाच कुंभमेळ्याहून परतीच्या प्रवासात असणाऱ्या एका भाविकांचा मृत्यू झाला आहे.
रवी जठार वय 61 राहणार देशपांडे गल्ली बेळगाव असे या भाविकाचे नाव आहे. कुंभमेळा आटोपून बेळगावकडे परतीच्या प्रवासात असताना रेल्वेत त्यांचं हृदयविकाराच्या झटक्याने निधन झालं आहे. रवी जठार हे जुन्या काळातील बेळगाव शहरातील वृत्तपत्र विक्रेते होते.
प्रयागराज येथील कुंभमेळ्यात मंगळवारी रात्री झालेल्या चेंगराचेंगरीत बेळगावच्या चार भाविकांचा मृत्यू झाल्याची बातमी ताजी असतानाच कुंभमेळ्याहून बेळगावला परतणाऱ्या एका भाविकांचा रेल्वेत हृदयविकाराच्या झटक्याने मृत्यू झाला आहे.
या घटनेमुळे बेळगावमध्ये हळहळ व्यक्त होत आहे. हळहळ व्यक्त होत आहे. कुंभमेळ्यातील एकूण मृतांची संख्या पाचवर पोहोचली असून यामधील चौघांचा प्रयागराज येथे चेंगराचेंगरीत मृत्यू झाला आहे तर आणखी एका व्यक्तीचा परतीच्या प्रवासादरम्यान रेल्वेतच हृदयविकाराच्या झटक्याने मृत्यू झाला आहे.
‘त्या’ मृत भाविकांचे मृतदेह विमानाने दाखल
बेळगाव लाईव्ह : प्रयागराज येथील महाकुंभमेळ्यात दाखल होण्यासाठी गेलेल्या बेळगावच्या ४ भाविकांचा मंगळवारी मध्यरात्री झालेल्या चेंगराचेंगरीत दुर्दैवी मृत्यू झाला. या चार मृतांपैकी दोघांचे मृतदेह दिल्लीहून बेळगाव सांबरा विमानतळावर विमानाने रवाना झाले.
शेट्टी गल्लीतील अरुण कोपर्डे आणि छत्रपती शिवाजी नगर येथील महादेवी बावनूर यांचे मृतदेह विमानाने आणण्यात आले आहेत. अरुण आणि महादेवी यांचे मृतदेह प्रयागराज येथून एकाच रुग्णवाहिकेतून दिल्लीला पाठवण्यात आले. उर्वरित दोन मृतांपैकी ज्योती – मेघा हत्तरवाट यांचे मृतदेह निर्धारित वेळेत दिल्लीत न पोहोचल्याने दुसऱ्या रुग्णवाहिकेतून आणण्यात येत आहेत, अशी माहिती उपलब्ध झाली आहे. वडगाव येथील मृत मायलेकींचे मृतदेह दिल्लीहून गोव्यात सायंकाळी 5.30 वाजता विमानाने आणले जातील आणि गोव्याहून रात्री 8.30 वाजता बेळगाव येथे पोहोचतील, अशी माहिती जिल्हाधिकारी मोहम्मद रोशन यांनी दिली.
