बेळगाव लाईव्ह : मराठा समाजाचा मानबिंदू असणाऱ्या मराठा सहकारी बँकेची पंचवार्षिक निवडणूक २२ डिसेंबर २०२४ रोजी होऊ घातली आहे. या निवडणुकीत शिवाजीनगर भागातील प्रशांत चिगरे यांची बिनविरोध निवड करण्यात आली असून उर्वरित संचालकांची निवड प्रक्रिया २२ डिसेंबर रोजी पार पडणार आहे. या निवडणुकीत सत्ताधारी पॅनेलने विद्यमान ४ संचालकांना वगळले असून नव्या पॅनेलमध्ये इतर चार उमेदवारांची निवड केली आहे. सत्ताधारी पॅनेलने निवडणुकीच्या पार्श्वभूमीवर शिवाजीनगरमधून प्रचाराची सुरुवात केली आहे.
मागील कार्यकाळात सत्ताधारी गटात कार्य केलेल्या लक्ष्मण होनगेकर(उचगाव), बी. एस. पाटील (राकसकोप), सुनील अष्टेकर (मुतगा) आणि सुशीलकुमार कोकाटे (बेळगाव) या चार संचालकाना पॅनल मधून वगळण्यात आले असून नवीन सदस्यांची त्या ठिकाणी वर्णी लावण्यात आली आहे.
ज्येष्ठ संचालक बाळाराम पाटील, विद्यमान अध्यक्ष दिगंबर पवार बाळासाहेब काकतकर यांच्या नेतृत्वाखाली नवीन पॅनल तयार करण्यात आले असून विद्यमान सत्ताधारी गटाने आपल्या पॅनलचा प्रचार देखील सुरू केला आहे. यावेळी शिवाजीनगर येथील प्रशांत चिगरे यांची बिनविरोध निवड झाल्यानंतर त्यांचा सत्कार करण्यात आला.
यासंदर्भात बँकेचे विद्यमान अध्यक्ष दिगंबर पवार यांनी ‘बेळगाव लाईव्ह’ शी बोलताना सांगितले, गेल्या पाच वर्षात बँकेने प्रगतीची घोडदौड कायम ठेवली असून गेल्या ५ वर्षात बँकेच्या ३ शाखा सुरु करण्यात आल्या आहेत. गणेशपूर, सांबरा रोड आणि खानापूर अशा तीन ठिकाणी सुरु असलेल्या शाखांपैकी सुरुवातीपासूनच गणेशपूर आणि सांबरा रोड येथील शाखा प्रगतीपथावर आहेत. बँकेची उत्तरोत्तर प्रगती होत असून सत्ताधारी पॅनेलमध्ये आगामी निवडणुकीच्या पार्श्वभूमीवर सामान्य गटातून सामान्य पदासाठी ज्येष्ठ संचालक बाळाराम पाटील, बाळासाहेब काकतकर, दिगंबर पवार यांच्या निवड कमिटीने मोहन चौगुले, विनोद हंगिरगेकर, विश्वनाथ हंडे या विद्यमान संचालकांसह मोहन बेळगुंदकर, विनायक होनगेकर, विक्रमसिंग कदम पाटील या नूतन उमेदवारांची निवड केली आहे.
तर महिला गटातून दीपक दळवी यांची स्नुषा दीपाली दळवी आणि रेणू किल्लेकर यांची निवड करण्यात आली आहे. यासह बी गटातून विश्वजित हसबे, अनुसूचित जमाती वर्गातून लक्ष्मण नाईक, आणि अनुसूचित जाती वर्गातून अशोक कांबळे यांची निवड करण्यात आली आहे. नव्या कायदयानुसार १० वर्षाच्या कालावधीसाठी संचालकांना कोणतेही बदल करता येत नाहीत. सहकार चळवळ मोडीत काढण्याचा सरकारचा हा डाव असून सहकार क्षेत्रातील अग्रगण्य बँक अधिकाधिक प्रगतीपथावर नेण्यासाठी सभासदांच्या सहकार्याची आवश्यकता आहे. सध्या बँकेच्या ठेवीची उलाढाल २५० कोटींची असून ५०० कोटींच्या ठेवीच्या उलाढालीच्या दिशेने वाटचाल करण्यासाठी सत्ताधारी पॅनल उद्दिष्ट ठेवून कार्यरत असल्याचे ते म्हणाले.
बाळासाहेब काकतकर यांनी माहिती देताना सांगितले, मराठा समाजाचा मानबिंदू असणाऱ्या मराठा सहकारी बँकेने यशस्वी ८२ वर्षे पूर्ण केली आहेत. या बँकेची पंचवार्षिक निवडणूक येत्या २२ डिसेंबर रोजी होणार आहे. या पार्श्वभूमीवर सत्ताधारी पॅनेलने शिवाजीनगरमधून प्रचाराचा शुभारंभ केला असून आजवर या बँकेच्या संचालकपदाची निवडणूक चुरशीचीच झाली आहे. बेळगावमधील आणि संपूर्ण जिल्ह्यातील पहिली बँक असणाऱ्या मराठा बँकेची निवडणूक आजतागायत बिनविरोध झाली नाही.
सभासदांची विश्वासार्हता जोपासत सभासद, ठेवीदार, कर्जदार, खातेदार, कर्मचारी आणि संचालक मंडळाच्या परस्पर सहकार्याने बँकेची प्रगतीपथावरील घोडदौड सुरु आहे. गेल्या पाच वर्षात १३० कोटींच्या ठेवींचा टप्पा २५० कोटींवर येऊन ठेपला असून भविष्यात हा टप्पा ५०० कोटींपर्यंत नेण्याचे उद्दिष्ट आहे.
सरकारी नियमानुसार २५५० सभासद निवडणुकीसाठी पात्र असून सभासदांनी सत्ताधारी पॅनेलला निवडून बँकेच्या प्रगतीसाठी हातभार लावावा, असे आवाहन त्यांनी केले.
