बेळगाव लाईव्ह : उत्तर कर्नाटक विकास मंच आणि इतर संघटनांच्या पदाधिकाऱ्यांच्यावतीने बेळगावला राज्याची दुसरी राजधानी म्हणून घोषित करण्याची मागणी केली आहे. यासंदर्भातील निवेदन जिल्हाधिकाऱ्यांमार्फत मुख्यमंत्री आणि उपमुख्यमंत्र्यांना देण्यात आले आहे.
1956 मध्ये भाषिक प्रदेशांची निर्मिती झाल्यापासून कर्नाटक राज्याच्या विविध भागांमध्ये विकास होण्याचे उद्दिष्ट होते, परंतु उत्तर कर्नाटकाचा विकास मागे पडला आहे. कर्नाटक सरकार आणि केंद्र सरकारला यावर सातत्याने आवाज उठवला जात आहे.
2007 मध्ये कर्नाटक सरकारने बेळगावला दुसरी राजधानी बनवण्याची घोषणा केली होती, पण त्याची अंमलबजावणी झाली नाही. बेळगावमध्ये सुवर्णसौध इमारत उभारण्यात आली असली तरी प्रशासनिक दृष्टीने ती कार्यरत नाही.
उत्तर कर्नाटकातील जनतेचे प्रगल्भ आंदोलन आणि विविध संघटनांच्या लढ्यामुळे बेळगावला राज्याची दुसरी राजधानी बनवण्याची मागणी तीव्र झाली आहे. तसेच, सरकारने बेळगाव सुवर्णसौधला प्रशासकीय शक्तीगृह म्हणून कार्यान्वित करावं, यासह बेळगावमध्ये मंत्रालय व समिती बैठका आयोजित कराव्यात, अशी मागणी करण्यात आली आहे. त्याचप्रमाणे, उत्तर कर्नाटकाच्या विकासासाठी तात्काळ पाऊले उचलावी अशी मागणीही निवेदनात करण्यात आली आहे.
बेळगावला राज्याची दुसरी राजधानी म्हणून घोषित करणे, त्यातील सुवर्णसौधमध्ये राज्य सरकारचे कार्यालये स्थापन करणे आणि त्या परिसरात आमदार निवासांची सोय करणे अशा सर्वांगीण उपायांची आवश्यकता असल्याचेही निवेदनात म्हटले आहे.
त्यासाठी राज्य सरकारने एकसंध राजकीय इच्छाशक्ती दाखवून उत्तर कर्नाटकाच्या प्रगतीसाठी योग्य निर्णय घ्यावेत, अशी मागणी करण्यात आली आहे. यावेळी उत्तर कर्नाटक विकास मंच आणि इतर संघटनांच्या पदाधिकारी, सदस्य आणि कार्यकर्ते उपस्थित होते.
