बेळगाव लाईव्ह :सोन्याचे दागिने चोरीच्या दोन वेगवेगळ्या गुन्ह्यांचा छडा लावण्यात यमकनमर्डी पोलिसांना यश आले आहे. याप्रकरणी चौघा जणांना गजाआड करण्यात आले असून त्यांच्याकडील एकूण 55 ग्रॅम सोन्याचे दागिने जप्त करण्यात आले आहेत.
पोलिसांनी अटक केलेल्या आरोपींची नावे लक्ष्मीकांत कृष्णप्पा बेडरहट्टी (वय 19), इराप्पा रवी नायक (वय 22), संजय सुरेश गडदक्की (वय 22, सर्व रा. दादबानट्टी) आणि संजय सुरेश गडाडक्की (रा. उळागड्डी, खानापुर) अशी आहेत. हुक्केरी तालुक्यातील यमकनमर्डी पोलीस ठाण्याच्या हद्दीतील इस्लामपूर येथील अडिवेप्पा लगमप्पा बगरायी यांचे 30 ग्रॅम सोने चोरीला गेले होते.
त्याचप्रमाणे यमकनमर्डी येथील सविता बसवराज नगरी यांचे 25 ग्रॅम सोन्याचे दागिने लांबविण्यात आले होते. याप्रकरणी यमकनमर्डी पोलिस ठाण्यात गुन्हा दाखल करण्यात आला होता.
गुन्हा दाखल होता आज पोलिसांनी तपास कार्य हाती घेऊन दादबानट्टी येथील लक्ष्मीकांत कृष्णप्पा बेडरहट्टी, इराप्पा रवी नायक, संजय सुरेश गडदक्की आणि उळागड्डी खानापुरा येथील संजय सुरेश गडाडक्की यांना ताब्यात घेतले.
पोलीस चौकशीत या सर्वांनी गुन्ह्याची कबुली दिल्यानंतर त्यांच्याकडील एकूण 55 ग्रॅम सोन्याचे दागिने जप्त करण्यात आले आहेत.
