बेळगाव लाईव्ह :दक्षिण महाराष्ट्र शिक्षण मंडळ संचलित मुतगे येथील न्यू इंग्लिश स्कूलचा सुवर्ण महोत्सव आणि पदवीपूर्व महाविद्यालयाचा रौप्य महोत्सव येत्या 29 डिसेंबर रोजी संपन्न होणार असून त्या अनुषंगाने जोमाने पूर्वतयारी केली जात आहे.
सुवर्ण महोत्सव समिती शाळा सुधारणा समिती वगैरे इतर समित्या नेमण्यात आल्या असून आजी – माजी शिक्षक, पालक, माजी विद्यार्थी व ग्रामस्थांच्या उपस्थितीत शाळेत दर रविवारी बैठकांचे आयोजन केले जात आहे.
मागील दोन महिन्यापासून पूर्व नियोजन व पूर्वतयारी संबंधित अनेक ठराव व निर्णय घेण्यात आले आहेत. हायस्कूलच्या सुवर्ण महोत्सव व पदवीपूर्व महाविद्यालयाच्या रौप्य महोत्सवाच्या निमित्ताने स्मरणिका काढण्यात येणार असून त्याचे काम अंतिम टप्प्यात पोहोचले आहे.
शाळेच्या सुशोभिकरणाचे कामही अंतिम टप्प्यात आहे. याच दरम्यान अनेक जण देणगीदार म्हणून पुढे येत आहेत. माजी विद्यार्थ्यांनी पुढाकार घेऊन कार्यक्रम यशस्वी करण्यासाठी कंबर कसली आहे.
उर्वरित कामे जलदगतीने मार्गी लावण्यासाठी आगामी बैठकांमध्ये निर्णय घेण्यात येणार असल्याचे सुवर्ण महोत्सव कमिटीने कळविले आहे.