बेळगाव लाईव्ह:केबल टेक्निशियन असल्याची बतावणी करून घरात घुसलेल्या एका भामट्याने वृद्ध महिलेच्या गळ्यातील सोनसाखळी हिसकावून पोबारा केल्याची घटना ढोर गल्ली, वडगाव येथे घडली.
ढोर गल्ली, वडगाव, येथील एका घरात काल बुधवारी दुपारी केबल टेक्निशियन असल्याची बतावणी करून एक तरुण घरात घुसला. त्यावेळी त्या घरात फक्त दोन वृद्ध महिला होत्या. त्यापैकी एका वृद्ध महिलेला तो तरुण भामटा तुमची टीव्हीची केबल तपासायची आहे असे सांगून पहिल्या मजल्यावर घेऊन गेला.
वृद्धापकाळमुळे नीट चालताही येत नसलेली ती महिला कशीबशी त्या भामट्यासोबत पहिल्या मजल्यावर गेली. तेथे येताच या भामट्याने महिलेला बेसावध ठेवत तिच्या गळ्यातील सोनसाखळी हिसकावून तेथून पळ काढला.
सदर प्रकार घडताच त्या महिलेने आरडाओरड केली, मात्र तोपर्यंत तो भामटा घरातून प्रसार झाला होता. घरात घुसून चेन स्नॅचींग करण्याचा दुपारी 3:42 वाजता घडलेला हा प्रकार घरातील सीसीटीव्ही कॅमेऱ्यामध्ये कैद झाला आहे.
सदर घटनेनंतर पोलिसांचा वचक नसल्यामुळेच अलीकडे चोर, भामट्यांचे भरदिवसा घरात घुसून चोरी करण्या इतपत धाडस वाढले असल्याची चर्चा ढोर गल्ली परिसरात सुरू होती.
तरी वरिष्ठ पोलिस अधिकाऱ्यांनी याची गांभीर्याने दखल घेऊन शहरातील महिला -वृद्धांच्या सुरक्षेच्या दृष्टीने तातडीने कारवाई करावी, अशी मागणी केली जात आहे.
