बेळगाव लाईव्ह:आर्ट्स सर्कल संस्थेतर्फे आयोजित ‘दिवाळी पहाट’ कार्यक्रमांतर्गत काल मंगळवारी गायिका विदुषी अपूर्वा गोखले यांचा गायनाचा बहारदार कार्यक्रम संपन्न झाला. रामनाथ मंगल कार्यालय येथे पहाटे ठीक 6 वाजता सुरू होऊन रंगलेल्या या कार्यक्रमाने श्रोत्यांची उत्स्फूर्त दाद मिळाली.
कार्यक्रमाच्या प्रारंभी मेधा मराठे यांनी सर्वांचे स्वागत केले. अपूर्वा गोखले यांच्या कार्यक्रमात रसिकांना प्रातःकालीन राग ऐकण्याची सुसंधी मिळाली. भटियार या रागाने आपल्या कार्यक्रमाची सुरुवात करताना प्रारंभी त्यांनी विलंबित तिलवाडा या तालामध्ये ‘बरलीन जाये’ हा ख्याल आणि द्रुत त्रितालात ‘तनिक सुनरी सतवचन अब’ ही बंदिश सादर केली.
त्यानंतर राग रामकलीतील विलंबित झूमर्‍यातील ‘आज राधे तोरे’ हा ख्याल आणि द्रुत त्रितालातील ‘हूँ तो बार बार’ ही बंदिश गोखले यांनी सादर केली.
मध्यंतरात कै. शुभा भागवत यांची कन्या सई भागवत यांनी आपल्या भावना व्यक्त केल्या आणि श्रोत्यांचे व सर्कलचे आभार मानले. कलाकारांचा परिचय मेधा मराठे यांनी करून दिला आणि सर्कलच्या पुढील कार्यक्रमांची रूपरेषा त्यांनी सांगितली.
लता कित्तूर ह्यांनी सर्वांचे आभार मानले. मध्यंतरात श्रोत्यांनी फराळाचा आस्वाद घेतल्यानंतर राग जौनपुरीतील विलंबित तिलवाडामधील ‘अब रंग घोलिया’ या ख्यालाने मैफिलीची पुन्हां सुरुवात झाली. त्यानंतर राग अंबिका सारंगातील द्रुत त्रितालातील बंदिश आणि एक अभंग गाऊन अपूर्वा गोखले यांनी कार्यक्रमाची सांगता केली.
अपूर्वा गोखले ह्यांना तबल्यावर अंगद देसाई आणि रवींद्र माने यांनी, तर तानपुर्‍यावर अपूर्वा गोखले यांच्या शिष्या अमृता शेनॉय आणि निधी केळकर यांनी उत्कृष्ट साथ दिली. कार्यक्रमाला श्रोते मोठ्या संख्येने उपस्थित होते.
