बेळगाव लाईव्ह : शैक्षणिक, आर्थिक दृष्ट्या मागासलेल्या दलित समाजातील विविध अंतर्गत जातींना आरक्षण देण्यात यावे, सदाशिव आयोगाची अंमलबजावणी करण्यात यावी, 101 अनुसूचित जाती समुदायांसाठी समान आरक्षणाची अंमलबजावणी करावी यासह विविध मागण्यांसाठी आज दलित संघटनांच्या वतीने बेळगावमध्ये आंदोलन छेडण्यात आले. डॉ. बाबासाहेब आंबेडकर उद्यान ते राणी चन्नम्मा चौकात आलेल्या मोर्चाने चन्नम्मा चौकात रास्ता रोको केला. यानंतर जिल्हाधिकारी कार्यालयावर मोर्चा काढून निवेदन सादर करण्यात आले.
युवा कर्नाटक भीमसेना युवा शक्ती संघाच्या नेतृत्वाखाली छेडण्यात आलेल्या आंदोलनात सर्वोच्च न्यायालयाच्या आदेशानुसार राज्य सरकारने अंतर्गत आरक्षणाची अंमलबजावणी करावी, न्यायमूर्ती सदाशिव आयोगानुसार, सर्वोच्च न्यायालयाच्या आदेशानुसार 101 अनुसूचित जाती जमातींसाठी अंतर्गत आरक्षण लागू करण्यात यावे अशी मागणी करत आंदोलकांनी जोरदार घोषणाबाजी केली. विविध दलित संघटनांच्या नेतृत्वाखाली जमलेल्या दलित समाज बांधवांनी जिल्हाधिकारी कार्यालय आवारात मोठी गर्दी केली होती.
आजवर सत्तेवर आलेल्या सरकारांनी आरक्षण देण्याचे आश्वासन दिले होते. परंतु आजवर कोणत्याही सरकारने आश्वासन पाळले नाही. राज्यात सत्तेवर असलेले काँग्रेस सरकार दलितांच्या बाजूने असल्याचे म्हटले जाते. यामुळे मुख्यमंत्री सिद्धरामय्या यांच्या नेतृत्वाखालील सरकारने हिवाळी अधिवेशनापूर्वी आरक्षणप्रश्नी सकारात्मक निर्णय घ्यावा, अन्यथा सुवर्ण विधानसौधला घेराव घालण्यात येईल, असा इशारा यावेळी देण्यात आला.
यावेळी संघटनेचे प्रवीण मादार, अक्षय के.आर. मल्लाप्पा अक्कमड्डी, उदय बसोजी आदींसह दलित संघटनांचे पदाधिकारी, कार्यकर्ते, समाजबांधव मोठ्या संख्येने सहभागी झाले होते.
Link plz
