बेळगाव लाईव्ह :श्रीक्षेत्र दक्षिण काशी म्हणून सुप्रसिद्ध असलेल्या शहरातील श्री कपिलेश्वर मंदिर येथे आज तिसरा श्रावण सोमवार आणि रक्षाबंधन यांचा अनोखा संगम पाहायला मिळाला. मंदिरात श्रावण सोमवार भक्तिभावाने आचरणात आणण्याबरोबरच भाविकांनी रक्षाबंधनही उत्साहात साजरे केले.
परंपरेनुसार तिसऱ्या श्रावण सोमवारनिमित्त श्री कपिलेश्वर मंदिरामध्ये आज पहाटेपासूनच काकड आरती पुजा-अभिषेक वगैरे कार्यक्रम पार पाडण्यात आले. श्रावण सोमवार असल्यामुळे सकाळपासूनच मंदिरामध्ये स्त्री -पुरुष भाविकांची गर्दी पाहायला मिळत होती. देवदर्शनासाठी भाविकांच्या मोठ्या रांगा लागल्या होत्या. यावेळी तिसरा श्रावण सोमवार आणि रक्षाबंधन असा योग जुळून आल्यामुळे त्याचा अनोखा संगम मंदिरात पाहायला मिळत होता.
त्यानिमित्ताने मंदिरात विशेष सजावट करण्यात आली आहे. श्रावण सोमवारची पूजा करण्याबरोबरच भाविक विशेष करून महिला श्री कपिलेश्वराला आणि त्याच्या समोरील नंदीला भक्तीभावाने राख्या वाहताना दिसत होत्या.
श्रावण मासानिमित्त श्री कपिलेश्वर मंदिर व्यवस्थापन व विश्वस्त मंडळाने यंदा मंदिरासमोरील प्रांगणात पर्वतातील ‘अर्ध नारी नटेश्वर’ हा भव्य देखावा सादर केला आहे. त्याचप्रमाणे तिसऱ्या श्रावण सोमवार निमित्ताने मंदिरामध्ये आज पंढरपूरच्या विठुरायाची दिंडी हा देखावा सादर करण्यात आला आहे. हे दोन्ही देखावे अतिशय सुरेख आणि लक्षवेधी असल्यामुळे ते पाहण्यासाठी भाविकांची गर्दी होत आहे. कांही उत्साही युवा भाविक देवदर्शनानंतर या देखाव्यांसमोर उभे राहून सेल्फीचा आनंद लुटताना दिसत होते.
बेळगाव लाईव्हशी बोलताना शिवाजी जुवेकर व त्यांच्या एका सहकाऱ्याने दक्षिण काशी श्री कपिलेश्वर मंदिरात आज तिसरा श्रावण सोमवार आणि रक्षाबंधनानिमित्त खास सजावट करण्यात आली असल्याचे सांगितले. श्रावण मासानिमित्त येथे पंढरपूर येथील विठुरायाच्या दिंडीचा देखावा सादर करण्यात आला आहे. हा देखावा इतका सुरेख आहे की मंदिरात जणू पंढरपूर अवतरल्यासारखे वाटत आहे.
पंढरपूरला जाऊ न शकणाऱ्यांसाठी श्री कपिलेश्वर मंदिरातील देखावा पाहिल्यानंतर निश्चितपणे प्रत्यक्ष पंढरपूरचे दर्शन घेतल्याचा आनंद मिळेल. याखेरीज मंदिर आवारातील ‘अर्ध नारी नटेश्वर’ हा देखावा देखील अत्यंत लक्षवेधी आहे. तसेच आज सायंकाळी 8 नंतर महाआरती आणि पालखी सोहळा होणार असल्याची माहिती देऊन याचा बहुसंख्येने भाविकांनी लाभ घ्यावा, असे आवाहन जुवेकर व त्यांच्या सहकाऱ्याने केले.
