बेळगाव लाईव्ह :येत्या श्री गणेशोत्सवापूर्वी आमच्या भागातील स्मार्ट स्मार्ट सिटीची रखडलेली विकास कामे युद्धपातळीवर पूर्ण करावीत. त्याचप्रमाणे श्री आगमन व विसर्जन मार्गावरील खुली गटारे बंदिस्त करण्याबरोबरच रस्त्यावरील खड्डे बुजवून पथदिपांच्या वीज वाहिन्या व्यवस्थित भूमिगत कराव्यात, अशी मागणी नार्वेकर गल्ली, शहापूर बेळगावच्या बाल गणेश उत्सव संघाने जिल्हाधिकाऱ्यांकडे केली आहे.
नार्वेकर गल्ली, शहापूर येथील बाल गणेश उत्सव संघाचे अध्यक्ष सागर नारायण पाटील आणि कार्याध्यक्ष युवराज विजयकुमार मुरकुंबी यांच्या नेतृत्वाखाली उपरोक्त मागणीचे निवेदन आज बुधवारी सकाळी जिल्हाधिकाऱ्यांना (डीसी) सादर करण्यात आले.
निवेदनाचा स्वीकार करून जिल्हाधिकारी मोहम्मद रोशन यांनी लवकरात लवकर योग्य ती कार्यवाही करण्याचे आश्वासन दिले. यावर्षी गणेशोत्सव येत्या सात सप्टेंबर 2024 पासून साजरा केला जाणार आहे मात्र आमच्या भागातील स्मार्ट सिटी अंतर्गत हाती घेण्यात आलेली रस्ते, गटार आणि भूमिगत वीज वाहिन्या (अंडरग्राउंडवायरिंग) ही विकास कामे अद्याप पूर्ण करण्यात आलेली नाहीत. गेल्या पाच वर्षापासून ही कामे प्रलंबित असून ज्यामुळे स्थानिक नागरिकांची गैरसोय होऊन त्यांना त्रास सहन करावा लागत आहे.
श्री गणेशोत्सवाच्या पार्श्वभूमीवर यंदा हवामान देखील बिघडलेले आहे. त्यामुळे आमची जिल्हा प्रशासनाला विनंती आहे की त्यांनी संबंधित विकास कामे त्वरेने लवकरात लवकर पूर्ण करावीत. मागील कांही वर्षांमध्ये कोरोना प्रादुर्भावामुळे निर्माण झालेली प्रतिकूल परिस्थिती लक्षात घेऊन श्री गणेशाच्या लहान मूर्तीची प्रतिष्ठापना करून गणेशोत्सव साधेपणाने साजरा करण्यात आला होता. मात्र यावर्षी श्रीच्या मूर्ती 12 फुटापेक्षा उंच मोठ्या असणार आहेत.
त्यामुळे श्री गणेशोत्सवापूर्वी श्रीमूर्ती आणण्याच्या आणि विसर्जनाच्या मार्गावरील खुली गटारे झाकण्यात यावीत. त्याचप्रमाणे रस्त्यावरील खड्डे बुजवून पथदिपांच्या विद्युत वाहिन्या व्यवस्थितरीत्या भूमिगत कराव्यात ही विनंती, अशा आशयाचा तपशील जिल्हाधिकाऱ्यांना सादर करण्यात आलेल्या निवेदनात नमूद आहे. निवेदन सादर करतेवेळी मध्यवर्ती गणेश महामंडळाचे सरचिटणीस महादेव पाटील आणि बाल गणेश उत्सव संघाचे अन्य पदाधिकारी आणि सदस्य उपस्थित होते.