बेळगाव लाईव्ह : जिल्हा पंचायत आणि पदवीपूर्व शिक्षण विभाग यांच्या संयुक्त विद्यमाने ग्रामीण भागातील आणि जिल्ह्यातील आर्थिकदृष्ट्या दुर्बल घटकातील विद्यार्थ्यांच्या शैक्षणिक उन्नतीसाठी “सीईटी-सक्षम” नावाचा अभिनव उपक्रम राबवण्यात आला असून हा उपक्रम शासकीय पदवीपूर्व महाविद्यालयात विज्ञान शाखेत शिक्षण घेणाऱ्या विद्यार्थ्यांसाठी राबविण्यात येत आहे.
बेळगाव जिल्हा पंचायतीचे मुख्य कार्यकारी अधिकारी राहुल शिंदे यांनी जिल्ह्यातील सर्व शासकीय विज्ञान पदवीपूर्व महाविद्यालयात शिकणाऱ्या गरीब कुटुंबातील आणि ग्रामीण भागातील हजारो विद्यार्थ्यांना सीईटीला सामोरे जाण्यासाठी सक्षम करण्याचा नवा प्रयत्न सुरू केला आहे. सीईटी सक्षम हा सरकारी पदवीपूर्व महाविद्यालयात विज्ञान शाखेत शिक्षण घेणाऱ्या विद्यार्थ्यांसाठी उपक्रम राबविण्यात येत असून दर महिन्याच्या दुसऱ्या आणि चौथ्या शनिवारी चाचण्या घेऊन सीईटी आणि नीट परीक्षेसाठी विद्यार्थ्यांकडून सराव करून घेण्यात येणार आहे.
याच उपक्रमाचा भाग म्हणून २४ ऑगस्ट रोजी जिल्ह्यातील पदवीपूर्व महाविद्यालयातील विद्यार्थ्यांसाठी पहिली सराव चाचणी आयोजित करण्यात आली असून कर्नाटक परीक्षा प्राधिकरणाने जिल्ह्यातील विद्यार्थ्यांसाठी बेळगाव आणि चिक्कोडी शैक्षणिक जिल्ह्यांच्या अखत्यारीतील एकूण 34 महाविद्यालयांमध्ये सीईटी/नीट परीक्षा आयोजित करण्यासाठी आवश्यक तयारी केली आहे. यासाठी चार समित्यांची स्थापना करण्यात आली असून या चार समित्यांचे समन्वयक म्हणून जिल्हा पंचायतचे मुख्य नियोजन अधिकारी गंगाधर दिवातारा काम पाहत आहेत.
बेळगाव जिल्ह्यात चिक्कोडी विभागातील १५ आणि बेळगाव परिमंडलातील १९ अशा एकूण ३४ शासकीय पदवीपूर्व विज्ञान महाविद्यालये कार्यरत आहेत. या चाचण्यांचे मूल्यांकन रविवारी करण्यात येणार असून मूल्यमापनाच्या आधारे जिल्हा आणि तालुका महाविद्यालयनिहाय क्रमवारी दिली जाईल. मूल्यमापन तपशीलांच्या आधारे, महाविद्यालयीन स्तरावरील अध्यापक पुढील सराव परीक्षेत विद्यार्थ्यांच्या परीक्षेला सामोरे जाण्याची क्षमता वाढविण्यासाठी कारवाई करतील. ज्या विद्यार्थ्यांनी त्यांच्या विषयात कमी गुण मिळवले आहेत याच्या कारणावर आधारित मार्गदर्शन करतील.
मंगळवारी पूर्व तयारी परीक्षेसंदर्भात विषय तज्ञांकडून शंका निवारण सत्र वर्ग आयोजित केले जाणार असून ज्या प्रश्नांची अधिक विद्यार्थ्यांनी चुकीची उत्तरे दिली आहेत त्या प्रश्नांसाठी स्पष्टीकरणात्मक वर्ग (फोकस्ड ॲप्रोच) आयोजित करून विद्यार्थ्यांची शिकण्याची क्षमता वाढवण्यासाठी कार्यक्रमांचे आयोजन करण्यात आले आहे. बेळगाव जिल्ह्यातील शासकीय पदवीपूर्व महाविद्यालयात विज्ञान शाखेत शिक्षण घेणाऱ्या विद्यार्थ्यांमधील सीईटी/नीट परीक्षेची भीती दूर करण्यासाठी आणि त्यांच्यामध्ये आत्मविश्वास निर्माण करण्यासाठी “सीईटी-सक्षम” नावाची अभिनव योजना जिल्ह्यात लागू करण्यात आली आहे.
