बेळगाव लाईव्ह :पावसाचा जोर मोठ्या प्रमाणात वाढत चालला आहे. यामुळे बेळगाव जिल्ह्यात विद्यार्थ्यांना शाळांमध्ये जाणे अवघड होणार असल्याची दखल घेऊन बेळगावच्या जिल्हाधिकाऱ्यांनी विद्यार्थ्यांना उद्या बुधवार दिनांक 24 जुलै रोजी आणखी एक दिवसाची सुट्टी जाहीर केली आहे.
जिल्हाधिकारी कार्यालयाकडून उपलब्ध पत्रकानुसार बेळगाव जिल्ह्यातील बेळगाव आणि खानापूर तालुक्यांमध्ये अंगणवाडी ते बारावी पर्यंतच्या सर्व शाळा 24 जुलै रोजी बंद राहणार आहेत. यामध्ये अंगणवाडी, सर्व प्रकारच्या प्राथमिक माध्यमिक आणि पदवीपूर्व महाविद्यालयातील अकरावी आणि बारावीचे वर्ग बंद राहतील असे कळवण्यात आले आहे.
याच बरोबरीने बेळगाव जिल्ह्यातील बैलहोंगल कित्तूर आणि कागवाड या तालुक्यामध्ये अंगणवाडी ते दहावी पर्यंतच्या शाळा बंद राहणार आहेत. यामध्ये अंगणवाडी प्राथमिक शाळा माध्यमिक शाळा यांचा समावेश आहे. संबंधित आदेश सर्व अनुदानित आणि विनाअनुदानित शिक्षण संस्थांना लागू असल्याची माहिती देण्यात आली आहे.
पावसाचा जोर वाढत चालला असल्यामुळे आणखी सुट्टीत वाढ होणार असल्याची शक्यता बेळगाव लाईव्हने व्यक्त केली होती. दरम्यान हा अंदाज खरा ठरला असल्याचे दिसून येत आहे.
पावसाचा मारा वाढत चालला आहे, यामुळे नदी नाले तलाव तुडुंब भरून वाहत आहेत. गारवा वाढल्याने विद्यार्थ्यांच्या आरोग्यावरही त्याचा परिणाम होत आहे. व्हायरल इन्फेक्शनचे प्रमाण वाढले आहे.
अशा परिस्थितीत जिल्हाधिकाऱ्यांनी सुट्टी जाहीर करावी अशी सूचना नागरिकांमधून होत होती. याचा फीडबॅक बेळगाव लाईव्ह च्या माध्यमातून जिल्हाधिकाऱ्यांना देण्यात आला होता. जिल्हाधिकाऱ्यांनी याची दखल घेऊन पुन्हा आणखी एक दिवस सुट्टी जाहीर केली आहे.
