बेळगाव लाईव्ह : ‘गावातील चोऱ्या कमी होईनात ग्रामपंचायतीने गाठले पोलीस स्थानक’ या मथाळ्याखाली बेळगाव लाईव्ह ने मंगळवारी बातमी प्रसिद्ध केली होती आणि ग्राम पंचायतीने ग्रामीण पोलिसांना या बाबतीत निवेदनही दिले होते त्यानंतर जागे झालेल्या पोलीस यंत्रणेने गावाला भेट दिली आहे.
मंगळवारी रात्री ग्रामीण पोलीस निरीक्षक हिरेमठ, पोलीस उपनिरीक्षक लकाप्पा आणि सहकाऱ्यांनी सर्व प्रथम धामणे ग्राम पंचायतीला भेट दिली ग्राम पंचायत सदस्य पंच मंडळी आणि ग्रामस्थांच्या सोबत बैठक केली त्यानंतर गेल्या काही महिन्यात गावात चोरी झालेल्या आणि वाहने जाळलेल्या नागरिकांच्या घरी भेट देऊन त्यांना धीर देत चोरट्यांना लवकरात लवकर गजाआड करू असे आश्वासन दिले.
सायंकाळी 7 ते रात्री 9 च्या दरम्यान भर पावसात ग्रामस्थांच्या सोबत सर्व गल्ल्या फिरून परेड केली यावेळी पोलिसांनी होणाऱ्या अप्रिय घटना आणि चोऱ्या रोखण्यासाठी ग्राम पंचायतीने घेतलेल्या पुढाकाराचे पोलीस निरीक्षक हिरेमठ यांनी कौतुक केले.
यापुढे धामणे गावात गस्त घातली जाईल स्वतंत्र पोलीस बंदोबस्त दिला जाईल ग्रामस्थांनी ग्राम पंचायतीने याकामी सहकार द्यावे असे आवाहन करत धामणे गावाला जिल्ह्यात आदर्श गाव बनवूया असे पोलीस निरीक्षक हिरेमठ यांनी सांगितले.
धामणे गावात घरात चोरी केलेले चोरटे कधी गजाआड होतात पोलीस कशा पद्धतीने त्यांचा बंदोबस्त करतात याकडे ग्रामस्थांचे लक्ष लागून राहिले आहे.
