बेळगाव लाईव्ह :बेळगाव येथील यशस्वी उद्योजक व कॅपिटल वन सोसायटीचे व्हा. चेअरमन शामराव सुतार यांचा चिरंजीव ओंकार सुतार याने द इन्स्टिट्यूट ऑफ चार्टर्ड अकाऊंटंट्स ऑफ इंडिया, नवी दिल्ली यांच्या मार्फत गेल्या मे 2024 मध्ये घेण्यात आलेल्या चार्टर्ड अकाउंटंट (सीए) परीक्षेत घवघवीत यश संपादन केले आहे.
शहरातील विजयनगर येथील रहिवासी असलेल्या ओंकार शामराव सुतार याचे माध्यमिक शिक्षण मराठी विद्यानिकेतन येथे तर 12 वी पर्यंतचे महाविद्यालयीन शिक्षण केएलई सोसायटीच्या लिंगराज महाविद्यालयामध्ये झाले आहे. बारावीत शिकत असतानाच त्याने चार्टर्ड अकाउंटंट बनण्याचा निश्चय करून त्या अनुषंगाने तयारी सुरू केली होती.
शालेय जीवनापासून एक हुशार विद्यार्थी म्हणून सुपरीचीत असलेल्या ओंकार याने 2018 मध्ये पुण्याच्या गरवारे कॉलेज ऑफ कॉमर्स मधून बी.कॉम.ची पदवी आणि त्यानंतर डिसेंबर 2022 मध्ये इंदिरा गांधी राष्ट्रीय खुल्या विद्यापीठातून मास्टर ऑफ कॉमर्स (एम.कॉम.) पदवी संपादन केली.
आता गेल्या मे 2024 मध्ये घेण्यात आलेल्या सी.ए. परीक्षेत त्याने घवघवीत यश मिळविले आहे. यासाठी त्याला आई वडील आणि कुटुंबातील सदस्यांचे प्रोत्साहन, पाठिंबा आणि सीए कृष्णानंद कामत व सीए पी. जी. भागवत यांचे बहुमोल मार्गदर्शन लाभले.
चार्टर्ड अकाउंटंट परीक्षा ही देशातील पहिल्या पाच कठीण परीक्षांपैकी एक मानली जाते. त्यामुळे ही परीक्षा उत्तीर्ण व्हावयाचे असल्यास स्वतःमध्ये शिस्त बाणवावी लागते. अभ्यासात सातत्य असावे लागते. त्यासाठी अनेक गोष्टींचा त्याग करण्याची तयारी असावी लागते.
आपले संपूर्ण लक्ष केंद्रित करून वेळच्या वेळी अभ्यास करावाच लागतो. हे सर्व थोडे कठीण असले तरी त्यामुळे निश्चितपणे यश लाभते, असे ओंकार याने बेळगाव लाईव्हशी बोलताना सांगितले. चार्टर्ड अकाउंटंट परीक्षेतील यशाबद्दल सध्या ओंकार शामराव सुतार याच्यावर अभिनंदनचा वर्षाव होत आहे.
