बेळगाव लाईव्ह :लोकायुक्तांच्या धाडीनंतर बेळगाव महानगरपालिकेने जन्म-मृत्यू दाखले देण्याचे काम तात्पुरते थांबवले आहे. या निर्णयामुळे विविध कामांसाठी या अत्यावश्यक कागदपत्रांवर अवलंबून असणाऱ्या नागरिकांची गैरसोय झाली आहे.
लोकायुक्तांच्या धाडीमध्ये महानगरपालिकेच्या आरोग्य व नगर रचना विभागाला लक्ष्य करण्यात आले होते. आरोग्य विभागाचाच भाग असलेल्या जन्ममृत्यू दाखले विभागात दाखल्यांसाठी घेतल्या जाणाऱ्या शुल्क रकमेवर आक्षेप घेण्यात आला होता.
कोणत्या दाखल्यासाठी किती शुल्क आकारण्यात आले त्याची पावती दिली का? दाखल्यांचे दर पत्रक आहे का? अशी विचारणा यावेळी करण्यात आली. मात्र संबंधित अधिकारी व कर्मचाऱ्यांना त्याचे उत्तर देता आले नाही. या पद्धतीने आरोग्य विभागाचे वाभाडे निघाल्यानंतर जन्म व मृत्यू दाखले वितरणच बंद करण्याचा निर्णय घेण्यात आला.
जन्म-मृत्यू दाखले वितरणाला स्थगिती देण्याचा हा निर्णय महापालिकेत चर्चेचा विषय झाला आहे. लोकायुक्तांनी प्रणालीतील गंभीर तफावत अधोरेखित केली आहे, ज्यामुळे जन्म -मृत्यू प्रमाणपत्र वितरण तात्पुरते थांबले आहे.
तथापी ही महत्त्वाची कागदपत्रे वेळेत उपलब्ध न झाल्याने नागरिकांना आव्हानांचा सामना करावा लागत आहे. जन्म-मृत्यू प्रमाणपत्रे मिळण्यास उशीर झाल्यामुळे सार्वजनिक नाराजी पसरली आहे. कारण योग्य कागदपत्रांशिवाय नागरिकांना अत्यावश्यक सेवांचा लाभ घेता येत नाही.
लोकायुक्तांनी ओळखलेल्या समस्यांचे निराकरण करण्यासाठी महानगरपालिका सक्रियपणे काम करत असून जन्म -मृत्यू प्रमाणपत्र जारी करणे त्वरित सुरू होईल, आश्वासन नागरिकांना देण्यात आले आहे. दरम्यान, नागरिकांच्या समस्या निवारण आणि चौकशीसाठी एक समर्पित हेल्पलाइन स्थापन करण्यात आली आहे.
तसेच लोकायुक्तांनी उपस्थित केलेल्या समस्यांचे निराकरण करण्यासाठी आणि प्रमाणपत्र जारी करण्याची प्रक्रिया अधिक विलंब न करता पूर्ववत करण्यासाठी प्रयत्न सुरू असल्याची माहिती आरोग्य अधिकारी डॉ. नाईक यांनी दिली.
