बेळगाव लाईव्ह :गुलमोहर बेळगाव कलाकार समुदायातर्फे येत्या गुरुवार दि. 9 ते सोमवार दि. 13 जून 2024 या कालावधीत चित्र प्रदर्शनाचे आयोजन करण्यात आले आहे.
टिळकवाडीतील हेरवाडकर शाळेजवळील वरेरकर नाट्य संघाच्या कला महर्षी के. बी. कुलकर्णी आर्ट गॅलरीमध्ये सकाळी 11 ते रात्री 8 या वेळेत हे प्रदर्शन प्रदर्शन भरणार आहे.
गुलमोहर बेळगाव कलाकार मंडळी हा कलाकारांचा एक उत्कट आणि उत्साही समुदाय गेल्या 6 वर्षांपासून स्थानिक कलाकारांना प्रोत्साहन देण्यासाठी चित्रकला प्रदर्शने भरवत आहे. त्यांच्या यावेळच्या प्रदर्शनाचे शीर्षक आहे ‘आत आणि पलीकडे’; एक आकार अनेक अभिव्यक्ती. प्रदर्शनात सहभागी कलाकारांनी त्यांची सर्जनशील शक्ती वाढवण्याचा प्रयत्न केला आहे. त्याच वेळी पूर्व-निर्धारित फ्रेम आकारात चित्रकला साकारली आहे. यावेळी कलाप्रेमींसाठी पुढील प्रमाणे रोमांचक चित्रकला आणि मातीची प्रात्यक्षिके सादर केली जाणार आहेत.
डॉ. किरण सूर्यवंशी : 9 जून रोजी कोलाज कलाकृती (दुपारी 3.30 वा.), अनंत नाडगौडा : 10 जून रोजी क्ले मध्ये कलाकृती (संध्याकाळी 4 वा.), चंद्रकला करगांवकर : 11 जून रोजी म्युरल आर्ट कलाकृती (संध्या. 4 वा.),
शिल्पा खडकभावी : 12 जून रोजी ऍक्रेलिकमध्ये कलाकृती (संध्या. 4 वा.), शिवाजी बेकवाडकर : 13 जून ऍक्रेलिकमध्ये (संध्या. 4 वा.).
वरेरकर नाट्य संघ, टिळकवाडी येथे आयोजित हे चित्र प्रदर्शन सर्वांसाठी खुले असून कलाप्रेमींनी बहुसंख्येने प्रदर्शनाचा लाभ घेऊन आनंद लुटावा, असे आवाहन आयोजकांनी केले आहे.
