बेळगाव लाईव्ह:सांडपाणी आणि घाणीने तुंबलेल्या खुल्या ड्रेनेजमध्ये पडलेल्या एका गाभण गाईला सामाजिक कार्यकर्त्यांनी बाहेर काढून जीवदान दिल्याची घटना आज शनिवारी सकाळी टिळकवाडीतील मराठा कॉलनी येथे घडली.
याबाबतची थोडक्यात माहिती अशी की मराठा कॉलनी येथील सांडपाणी आणि घाणीने तुंबलेल्या खुल्या ड्रेनेजचा अंदाज न आल्यामुळे एक गाभण गाय त्यामध्ये पडली होती.
सदर प्रकार आसपासच्या लोकांच्या निदर्शनास येतात त्यांनी फेसबुक फ्रेंड्स सर्कलचे (एफएफसी) सदस्य आणि अग्निशामक दलाला संपर्क साधून घटनेची माहिती दिली. तेंव्हा एफएफसीच्या संतोष दरेकर व त्यांच्या सहकाऱ्यांनी तात्काळ घटनास्थळी धाव घेतली. त्यावेळी ड्रेनेज मध्ये पडलेली गाय असहाय्यपणे आपला जीव वाचवण्यासाठी धडपडत असल्याचे त्यांच्या निदर्शनास आले. दरम्यान अग्निशामक दलाचे जवान देखील त्याठिकाणी दाखल झाले.
या सर्वांनी ड्रेनेजच्या सांडपाण्यात बुडालेल्या त्या गाईला दोरीच्या सहाय्याने महत्त्वयासाने बाहेर काढले. या पद्धतीने अखेर गाईला जीवदान मिळताच उपस्थित सर्वांनी सुटकेचा निश्वास सोडला.
त्याचप्रमाणे अशा धोकादायक खुल्या ड्रेनेजकडे महापालिकेच्या संबंधित अधिकाऱ्यांनी गांभीर्याने लक्ष देऊन एखादी दुर्घटना घडण्यापूर्वी हे ड्रेनेज बंदिस्त केले पाहिजेत, असे मतही उपस्थितांमध्ये व्यक्त होत होते.
