बेळगाव लाईव्ह:महिलांसाठी मोफत बस प्रवासाची शक्ती योजना देऊन राज्य सरकारने जनतेला कसे पश्चातापात टाकले आहे याचे उदाहरण म्हणजे परिवहन मंडळाच्या बसमध्ये झालेल्या महिलांच्या तोबा गर्दीमुळे एक विद्यार्थिनी घुसमटून मूर्च्छित पडल्याची घटना आज मंगळवारी शहरात घडली.
बेळगाव मध्यवर्ती बस स्थानक ते उचगाव दरम्यान धावणारी परिवहन मंडळाची बस आज नेहमीप्रमाणे हिंडलगा मार्गे उच गावाकडे निघाली होती. स्थानकातून निघालेली ही बस राणी चन्नम्मा सर्कलपर्यंत महिलांच्या गर्दीने तुडुंब भरली होती.
सदर 37 जणांची आसन व्यवस्था असलेल्या बसमध्ये 120 जणांनी गर्दी केली होती. परिणामी सदर गर्दीत घुसमटून एका विद्यार्थिनीची उभ्या उभ्या शुद्ध हरपून ती शेजारील प्रवाशाच्या अंगावर कोसळली. त्यामुळे बस वाहकाने तातडीने वाटेतच बस थांबविली.
तसेच त्या विद्यार्थिनीला बस मधून खाली उतरवून प्रथमोपचार करण्यात आले. शुद्धीवर आलेल्या विद्यार्थिनीला बरे वाटू लागताच प्रवाशांना घेऊन बस पुन्हा उचगावच्या दिशेने मार्गस्थ झाली.
