बेळगाव लाईव्ह:उन्हाळ्याच्या सुट्टीतील प्रवाशांची अतिरिक्त गर्दी दूर करण्यासाठी नैऋत्य रेल्वेने गेल्या 29 एप्रिलपासून दर सोमवारी व गुरुवारी बेळगाव मार्गे सुरू केलेल्या हुबळी – ऋषिकेश – हुबळी उन्हाळी विशेष एक्सप्रेस रेल्वे (क्र. 06225/06226) सेवेचा कालावधी समाप्त होत आला असून आता ही रेल्वे सेवा येत्या गुरुवार दि. 30 मे 2024 पर्यंत उपलब्ध असणार आहे.
रेल्वे क्र. 06225 हुबळी ते ऋषिकेश उन्हाळी विशेष एक्सप्रेस रेल्वेसेवा गेल्या सोमवार दि 29 एप्रिलपासून प्रारंभ झाली आहे. दर सोमवारी असणारी सदर विशेष एक्सप्रेस रेल्वे येत्या 27 मे 2024 पर्यंत म्हणजे दि. 29 एप्रिल, 6, 13, 20 व 27 मे रोजी हुबळीहून प्रवासाला निघेल.
त्याचप्रमाणे रेल्वे क्र. 06226 – ऋषिकेश ते हुबळी ही उन्हाळी विशेष एक्सप्रेस रेल्वेसेवा गुरुवार दि. 2 मे 2024 रोजी प्रारंभ होत आहे. ही रेल्वे येत्या 30 मे 2024 पर्यंत दर गुरुवारी म्हणजे दि. 2, 9, 16, 23 व 30 मे रोजी प्रवासाला निघेल. निर्धारित कालावधीत या दोन्ही रेल्वे एकूण प्रत्येकी 5 फेऱ्या करतील.
रेल्वे क्र. 06225 हुबळी ते ऋषिकेश उन्हाळी विशेष एक्सप्रेस रेल्वे येत्या सोमवारपासून 27 मेपर्यंत दर सोमवारी सायंकाळी 7:45 वाजता हुबळी येथून सुटेल. त्यानंतर धारवाड मार्गे रात्री 12:25 वाजता बेळगाव रेल्वे स्थानकावर पोहोचून 12:30 वाजता पुढे ऋषिकेशच्या दिशेने प्रस्थान करेल.
बेळगावसह घटप्रभा, मिरज येथे थांबे असलेली ही रेल्वे पुणे मार्गे बुधवारी सायंकाळी 6:45 वाजता ऋषिकेश येथे पोहोचेल. त्याचप्रमाणे परतीच्या मार्गावर रेल्वे क्र. 06226 – ऋषिकेश ते हुबळी ही उन्हाळी विशेष एक्सप्रेस रेल्वे येत्या गुरुवार दि. 2 मेपासून 30 मेपर्यंत दर गुरुवारी सायंकाळी 5:55 वाजता ऋषिकेश येथून सुटेल
आणि शनिवारी दुपारी 2:25 वाजता बेळगाव रेल्वे स्थानकात दाखल होऊन 2:30 वाजता हुबळीकडे रवाना होईल. हुबळी येथे ही रेल्वे सायंकाळी 5:30 वाजता पोहोचेल.
