बेळगाव लाईव्ह :या महिन्याअखेर सेवानिवृत्त होत असल्यामुळे बेळगाव शहराचे पोलीस आयुक्त एस. एन. सिद्रामप्पा यांनी आज शनिवारी बेळगाव सार्वजनिक श्री गणेशोत्सव महामंडळ आणि शहापूर श्री गणेश उत्सव महामंडळाच्या पदाधिकाऱ्यांना आपल्या निवासस्थानी निमंत्रित करून सहकार्याबद्दल आभार प्रकट केले.
बेळगाव शहराचे पोलीस आयुक्त एस. एन. सिद्धरामप्पा हे येत्या 29 फेब्रुवारी रोजी सेवानिवृत्त होत आहेत. यासाठी त्यांनी आपल्या आयुक्त पदाच्या कारकिर्दीत सहकार्य केलेल्या शहरातील विविध संस्था -संघटनांना धन्यवाद देण्याचा स्तुत्य उपक्रम हाती घेतला आहे.
त्या अनुषंगाने पोलीस आयुक्तांनी आज शनिवारी सकाळी बेळगाव सार्वजनिक श्री गणेशोत्सव महामंडळ आणि शहापूर सार्वजनिक श्री गणेशोत्सव महामंडळ यांच्या पदाधिकाऱ्यांना आपल्या सदाशिवनगर येथील निवासस्थानी चहापाण्यासाठी निमंत्रित केले होते.
त्यावेळी आपली पोलीस आयुक्तपदाची कारकीर्द यशस्वी करण्यासाठी सहकार्य केल्याबद्दल सिद्धरामप्पा यांनी सर्व पदाधिकाऱ्यांना धन्यवाद देऊन आभार मानले.
सार्वजनिक श्री गणेशोत्सव महामंडळ बेळगावचे अध्यक्ष रमाकांत कोंडुसकर आणि शहापूर श्री गणेशोत्सव महामंडळाचे सचिव राजू सुतार यांनी देखील महामंडळाच्यावतीने पोलीस आयुक्त सिद्धारामप्पा यांचा पुष्पगुच्छ देऊन सन्मान केला.
याप्रसंगी महामंडळाचे पदाधिकारी माजी नगरसेवक रणजीत चव्हाण -पाटील, विकास कलघटगी, शिवराज पाटील, महादेव पाटील, रमेश कळसन्नावर, धनंजय पाटील,अजित कोकणे,शंकर बाबली महाराज, राजेंद्र हंडे अंकुश केसरकर,मदन बामणे, सुधाकर चाळके किरण हुद्दार उदय पाटील विशाल कंग्राळकर आदी पदाधिकारी व सदस्य उपस्थित होते. यासाठी विकास कलघटगी यांनी विशेष प्रयत्न केले.
