बेळगाव लाईव्ह : माजी मुख्यमंत्री जगदीश शेट्टर यांच्या घरवापसी नंतर आता लक्ष्मण सवदी हेदेखील भाजपाकडे परततील अशी शक्यता राजकीय वर्तुळात व्यक्त केली जात असून काँग्रेस नेत्यांकडून मात्र या गोष्टी फेटाळण्यात येत आहेत.
याच पार्श्वभूमीवर आज हुबळी येथे प्रसारमाध्यमांना प्रतिक्रिया देताना मंत्री एच. के .पाटील यांनी लक्ष्मण सवदी हे काँग्रेसमध्येच कायम राहतील, असा विश्वास व्यक्त केला आहे.
लक्ष्मण सवदी यांच्यावर अविश्वास नाही किंवा शंका नाही. ते आमच्याच पक्षात राहतील यावर माझा पूर्ण विश्वास असल्याचे सांगितले. यावेळी जगदीश शेट्टर यांच्या घरवापसीबाबत त्यांनी खंत व्यक्त केली.
यावेळी काँग्रेस सरकारने जारी केलेल्या हमी योजनांसंदर्भातही त्यांनी प्रतिक्रिया दिली. काँग्रेस सरकार राबवत असलेल्या हमी योजना या देशाच्या इतिहासातील क्रांतिकारक योजना असून या योजनांमुळे अनेक गरीब कुटुंबांचे कल्याण होत आहे.
हि बाब भाजपाला सहन होत नसल्याने भावनिक मुद्द्यावर भाजप राजकारण करून जनतेचे लक्ष विचलित करण्याचे काम भाजप करत असल्याची टीकाही त्यांनी केली.
