बेळगाव लाईव्ह :बेळगाव एपीएमसी भाजी मार्केट येथे काल बुधवारी भर दिवसा दुचाकीच्या डिकीतील 1 लाख 40 हजार रुपये लंपास करणाऱ्या भामट्याला एपीएमसी पोलिसांनी मोठ्या शिताफिने तात्काळ काल सायंकाळीच गजाआड केल्याचे समजते.
त्याबाबतची थोडक्यात माहिती अशी की, मारुती गल्ली, लोंढा येथील व्यापारी राजू डिकोस्टा काल बुधवारी सकाळी बेळगाव एपीएमसी मार्केट येथे कांदा व बटाट्यासह अन्य साहित्य घाऊक खरेदी करण्यासाठी आले होते.
त्यावेळी त्यांनी आपल्या दुचाकीच्या डिकीत छोट्या बॅगेमध्ये 1 लाख 40 हजार रुपयांची रोकड ठेवली होती. मार्केटमध्ये रस्त्यावर दुचाकी पार्क करून ते बाजारपेठेकडे जिन्नस आणण्यासाठी गेले असता दुचाकी वरून आलेल्या एका भामट्याने त्यांच्या दुचाकीच्या डिकीतील पैशाची बॅग लंपास केली होती.
चोरीचा हा प्रकार सीसीटीव्ही कॅमेरामध्ये कैद झाला होता. याबाबत तक्रार दाखल होताच एपीएमसी पोलिसांनी सीसीटीव्ही कॅमेऱ्यातील फुटेजचे सहाय्य घेत वेगाने तपास चक्रे फिरवून कांही तासात राजू डिकोस्टा यांचे पैसे लांबवणाऱ्या भामट्याला ताब्यात घेऊन पोलीस स्थानकात आणल्याचे कळते.
