बेळगाव लाईव्ह :कक्केरी (ता. खानापूर, जि. बेळगाव) येथे आज सोमवारपासून येत्या बुधवार दि. 25 ऑक्टोबर पर्यंत साजऱ्या होणाऱ्या श्री बिस्टम्मादेवी यात्रोत्सवाच्या वेळी कोणत्याही प्रकारचा पशुबळी देऊ नये, असा आदेश जिल्हा दंडाधिकाऱ्यांनी काढला असून या आदेशाचे उल्लंघन केल्यास कठोर कारवाईचा इशारा देण्यात आला आहे.
खानापूर तालुक्यात प्रसिद्ध असलेल्या कक्केरी येथील श्री बिष्टा देवीची यात्रा आजपासून प्रारंभ झाली आहे. कर्नाटक प्राणी हत्या प्रतिबंध आणि संरक्षण अधिनियम 2020 नुसार यात्रा अथवा उत्सवाच्या दरम्यान देवाच्या नावाने प्राण्यांचा बळी देणे हा गुन्हा आहे.
यासाठी कक्केरी येथील श्री बिस्टादेवी यात्रा काळात म्हणजे आज सोमवारी सकाळी 6 वाजल्यापासून बुधवार दि. 25 ऑक्टोबर 2023 रोजी दुपारी 12 वाजेपर्यंत देवस्थान आवारात अथवा गावाच्या व्याप्तीत भाविकांनी, नागरिकांनी देवाच्या नावाखाली कोणत्याही प्रकारच्या प्राणी किंवा पक्षांचा बळी देण्यावर निर्बंध घालण्यात आला आहे. जिल्हाधिकारी तथा जिल्हा दंडाधिकारी नितेश पाटील यांनी तसा आदेश जारी केला आहे.
दरम्यान, कक्केरी येथील श्री बिष्टादेवी मंदिरामध्ये काल रविवारी झालेल्या बैठकीमध्ये देखील तहसीलदार प्रकाश गायकवाड यांनी देवीच्या यात्रेत कोणताही पशुबळी देऊ नये, पशुबळी दिल्यास कडक असा इशारा दिला आहे.
पशुबळीसारख्या अनिष्ट प्रथा रोखण्यासाठी सरकारकडून कठोर उपाय योजना करण्यात येत आहेत. यासाठी नागरिकांनी सहकार्य करावे, असे आवाहन तहसीलदार गायकवाड यांनी केले आहे.
