बेळगाव लाईव्ह:शिमगा आणि गणेशोत्सव घाटवासीयांसाठी मोठी पर्वणी असते. या दोन्ही उत्सवांचा येथे थाट न्यारा असतो. या उत्सवातून आजही विधायकता आणि परंपरा जपणाऱ्या पश्चिम घाटातील कणकुंबी, पारवाड परिसरात यंदाही संपूर्ण गावाने एकत्र येऊन सहजीवन आणि परस्पर सहकार्याचे दर्शन घडवत श्री गणेशोत्सव साजरा केला आणि शेवटी निर्मळ भावासह जड अंतःकरणाने सातव्या दिवशी बाप्पाला निरोप दिला.
डॉल्बीचा दणदणाट आणि फटाक्यांची आतिषबाजी अद्याप येथे न पोहोचल्यामुळे येथील उत्सव वेगळा तितकाच हवाहवासा वाटणारा आहे. गोवा, महाराष्ट्र आणि सीमाभाग असा संमिश्र प्रभाव तसेच कोकण आणि गोवा जवळ असल्यामुळे तेथील चालीरीती आणि परंपरांवरांचा प्रभाव येथील सण आणि उत्सवांवर पहावयास मिळतो. खानापूर तालुक्यातील कणकुंबी, पारवाड परिसरात कोकणच्या धर्तीवर गणेशोत्सव साजरा करण्यावर भर दिला जातो. संपूर्ण गावकरी एकत्रितपणे घरगुती गणरायाचे स्वागत करतात. विशेष करून पाच ते सात दिवसाचा गणराया पूजला जातो.
आज सातव्या दिवशी पारवाड, चिखले, चिगुळे, कणकुंबी, मान, हुळंद, चोर्ला, तळावडे, बेटणे येथे गणरायाला भक्तिभावाने निरोप देण्यात आला. भजन, कीर्तनाच्या गजरात वारकऱ्यांच्या दिंडीच्या धर्तीवर मिरवणूक काढून श्री गणेश मूर्तीचे विसर्जन केले गेले. विसर्जन मिरवणुकीत महिला, अबालवृद्ध आणि तरुण अमाप उत्साहात सहभागी झाले होते.
कणकुंबी, पारवाड परिसरात श्री गणेशोत्सवाची महिनाभर आधीपासून तयारी सुरू होते. महाराष्ट्र, गोवा येथून श्रीमूर्ती आणल्या जातात. प्रतिष्ठापनेपासून विसर्जनापर्यंत उत्सवाशी निगडित परंपरा पार पडण्यासाठी सर्व गाव एकत्र येतो.
गावात सार्वजनिक गणेशोत्सव नसला तरी प्रत्येकाच्या घरात पुजण्यात येणाऱ्या घरगुती बाप्पाची सेवा करताना सगळ्यांचा सहभाग आणि सहकार्य लाभते हे विशेष होय.
