बेळगाव लाईव्ह : भाजप नेते माजी मंत्री रमेश जारकीहोळी यांनी बेंगलोर येथे आज सोमवारी माजी मुख्यमंत्री एच. डी. कुमारस्वामी यांची भेट घेऊन त्यांच्या प्रकृतीची विचारपूस केली. यावेळी दोन्ही नेत्यांमध्ये सुमारे 1 तासाहून अधिक काळ चर्चा झाली.
कुमारस्वामी यांच्या भेटीनंतर प्रसिद्धी माध्यमांशी बोलताना माजी मंत्री रमेश जारकीहोळी यांनी ही एक सदिच्छा भेट होती. त्यांच्या प्रकृतीची चौकशी करण्यासाठी मी आलो होतो. अलीकडे प्रवासामुळे मला त्यांची भेट घेता आली नव्हती. तेव्हा आज त्यांची भेट घेऊन त्यांच्या तब्येतीची विचारपूस करण्यासाठी मी आलो होतो, असे जारकीहोळी यांनी सांगितले.
भाजप हाय कमांड निधर्मी जनता दला (जेडीएस) सोबत मैत्री करण्यास इच्छुक आहे. राज्यातील सध्याच्या खराब सरकारचे उच्चाटन झाले पाहिजे. जेडीएस सोबत युती करण्याचा निर्णय चांगला असून मी त्याचे वैयक्तिकरित्या स्वागत करतो, असे ही ते म्हणाले.
मागील समिश्र सरकार कोसळवले त्याप्रमाणे सध्याचे सरकार कोसळण्याचा प्रयत्न करणार का? या प्रश्नाला उत्तर देताना ती गोष्ट सांगून करण्यासारखी नाही, असे त्यांनी स्पष्ट केले. माजी मुख्यमंत्री एच. डी. कुमारस्वामी यांना सोबत घेऊन दिल्लीला या असा बुलावा आल्यामुळे रमेश जारकीहोळी यांनी माजी मुख्यमंत्री कुमारस्वामी यांची भेट घेतल्याचे भाजप सूत्रांकडून सांगण्यात येत आहे.
तसेच येत्या गुरुवारी रमेश जारकीहोळी आणि एच. डी. कुमारस्वामी हे उभयता नवी दिल्लीला जाणार असून तेथे भाजपच्या वरिष्ठांसोबत कर्नाटक राज्यातील राजकीय घडामोडींबाबत चर्चा करणार असल्याची माहितीही पुढे आली आहे.
या पद्धतीने माजी मंत्री रमेश जारकीहोळी हे उत्तर भारतातील आपली टेम्पल रन आटोपून आता थेट राजकीय रणांगणात उतरले आहेत.
