बेळगाव तालुक्यात चोरट्यांचा धुमाकूळ सुरूच असून बाची (ता. जि. बेळगाव) येथील अंगणवाडीचा दरवाजा फोडून चोरट्यांनी तांदूळ, साखर, खाद्यतेल वगैरे मुलांच्या माध्यम आहाराचे साहित्य लंपास केल्याची घटना आज गुरुवारी सकाळी उघडकीस आली.
बाची (ता. जि. बेळगाव) येथील बेळगाव -वेंगुर्ला हमरस्त्याला लागूनच प्राथमिक शाळा आणि अंगणवाडी केंद्र आहे. नेहमीप्रमाणे आज सकाळी अंगणवाडी केंद्रातील शिक्षिका आणि त्यांचे सहाय्यक अंगणवाडी उघडण्यासाठी गेले असता चोरीचा प्रकार त्यांच्या निदर्शनास आला.
चोरट्यांनी काल रात्री प्रथम प्राथमिक शाळेमध्ये प्रवेश करून त्या ठिकाणच्या स्वयंपाकगृहातील साहित्यावर डल्ला मारण्याचा प्रयत्न केला. मात्र त्यांना त्या ठिकाणी काहीच न मिळाल्यामुळे त्यांनी आपला मोर्चा अंगणवाडी केंद्राकडे वळविला.
अंगणवाडी केंद्राला लावलेले कुलूप एक्सा ब्लेडने कापून आत प्रवेश केलेल्या चोरट्यांनी तेथील माध्यान आहाराच्या साहित्यावर डल्ला मारला. अंगणवाडी केंद्रात ठेवलेला 6 पोती तांदूळ, 10 किलो रवा, 10 किलो साखर, एक किलो प्रमाणे खाद्यतेलाची 20 पाकिटे, 10 किलो गूळ इतके साहित्य चोरट्यांनी लंपास केले आहे.
सदर चोरीच्या प्रकाराची माहिती मिळताच बेळगाव ग्रामीण पोलिसांनी घटनास्थळी दाखल होऊन पंचनामा केला. तसेच चोरट्यांचा शोध हाती घेतला आहे. सदर अंगणवाडी केंद्रात यापूर्वी चार वेळा चोरीचा प्रकार घडला आहे. या पद्धतीने वारंवार चोरी होत असल्यामुळे चोरट्यांचा बंदोबस्त करण्यासाठी सदर परिसरात सीसीटीव्ही कॅमेरे बसविण्यात यावेत अशी मागणी गावकऱ्यांकडून केली जात आहे.
