आज महिन्याचा दुसरा शनिवार हा सरकारी सुट्टीचा दिवस होता, मात्र तरीही महापालिका आयुक्त अशोक दूडगुंटी यांनी भल्या सकाळी शहराचा दौरा करून विविध ठिकाणच्या स्वच्छता कामाची पाहणी केली.
मनपा आयुक्त दूडगुंटी यांनी आज शनिवारी सकाळी 5.45 वाजता आपल्या पाहणी दौऱ्याला सुरुवात केली. त्यांनी सर्वप्रथम महापालिकेच्या वाहन गॅरेजला आणि त्यानंतर किर्लोस्कर रोड, खासबाग वेस्ट लँड, ई-कचरा केंद्राला भेट दिली. तसेच तेथील रात्र निवारा व्यवस्थेच्या कामाची पाहणी करून माहिती घेतली.
कनिष्ठ आरोग्य निरीक्षक शिल्पा कुंभार यांनी इंदूर मॉडेलनुसार त्यांना नेमून दिलेल्या 6 पैकी 5 वॉर्डांचे केलेले विलगीकरण आयुक्तांनी पाहिले. यावेळी त्यांनी सर्व आरोग्य निरीक्षक आणि पर्यावरण अभियंत्यांना उर्वरित आरोग्य निरीक्षकांप्रमाणेच सुचना पाळण्यास सांगितले. त्यानंतर पीके क्वार्टर्सला भेट देऊन आयुक्तांनी तेथील रहिवाशांच्या समस्या व तक्रारी जाणून घेतल्या.
