बेळगाव लाईव्ह:महापालिकेने शहरातील विविध व्यापारी संकुलांतील आणि बाजारपेठेतील गाळ्यांच्या लिलावाचे आयोजन करण्यात आले. 21 सप्टेंबरपासून 13 ऑक्टोबरपर्यंत ही लिलाव प्रक्रिया राबवण्यात येणार आहे. यामध्ये तब्बल 208 गाळ्यांचा लिलाव करण्यात येणार आहे.
महापालिकेच्या मालकीच्या व्यापारी गाळ्यांचा लिलावासाठी महापालिकेने तिसर्यांदा जाहीर लिलावाचे आयोजन केले आहे. यामध्ये गणपत गल्ली, चव्हाट गल्ली,
किर्लोस्कर रोड, हिंदवाडी, माळमारूती, महात्मा फुले मार्केट, अनगोळ, खासबाग, चावी मार्केट, कसाई गल्ली, सीबीटी, एपीएमसी रोड, कणबर्गी, अशोक नगर, गोगटे सर्कल, आरपीडी सर्कल, धर्मवीर संभाजी महाराज चौक आदी ठिकाणी असलेल्या महापालिकेच्या गाळ्यांचा लिलाव करण्यात येणार आहे.
हे गाळे बारा वर्षांच्या भाडेकरारावर देण्यात येणार असुन अनुसुचित जाती, जमाती वर्गाला 18 टक्के राखीवता आहे. तर पन्नास टक्क्यांहून अधिक अपंगत्व असलेल्यांना दीडशे चौरस फुटाचे गाळे लॉटरी पद्धतीने देण्यात येणार आहेत, असे महापालिका आयुक्त अशोक दुडगुंटी यांनी कळवले आहे.
दीड वर्षांत महापालिकेने या गाळ्यांच्या लिलावासाठी तिसर्यांदा प्रयत्न केले आहेत. गेल्या वेळी काही गाळ्यांचा लिलाव झाला. पण, त्या लिलावावर काहींनी आक्षेप घेतला होता. त्यामुळे संपूर्ण लिलाव प्रक्रियाच वादात सापडली होती. आता तरी या गाळ्यांचा लिलाव होणार का, हे पाहावे लागणार आहे.
