शहरातील खाजगी भाजी मार्केटच्या बेकायदेशीर स्थापनेची सखोल चौकशी करून दोषींवर कारवाई केली जावी. तसेच हे खाजगी भाजी मार्केट रद्द केले जावे, या मागणीसाठी बेळगाव एपीएमसी भाजी मार्केट व्यापारी संघटनेतर्फे आज महापालिकेसमोर आंदोलन छेडून महापालिका आयुक्तांना निवेदन सादर करण्यात आले.
शहरातील खाजगी भाजी मार्केटच्या विरोधात एपीएमसी भाजी मार्केट व्यापारी संघटनेतर्फे आज शुक्रवारी सकाळी बेळगाव महापालिकेसमोर आंदोलन छेडण्यात आले.
यावेळी उपस्थित भाजी व्यापाऱ्यांनी धरणे सत्याग्रह करून जोरदार निदर्शने केली. खाजगी भाजी मार्केट स्थापनेतील गैरप्रकाराची चौकशी व्हावी खाजगी भाजी मार्केट रद्द करावे, अशा घोषणा यावेळी देण्यात येत होत्या. सदर आंदोलनात एपीएमसी येथील जवळपास 200 व्यापारी सहभागी झाले होते. या व्यापाऱ्यांच्या वतीने संघटनेच्या नेत्यांनी मनपा आयुक्तांना उपरोक्त मागणीसह विविध 24 मागण्यांचे निवेदन सादर केले. निवेदनाचा स्वीकार करून आयुक्तांनी योग्य ती कार्यवाही करण्याचे आश्वासन दिले आहे.
यावेळी प्रसिद्धी माध्यमांची बोलताना व्यापारी गजानन(भाऊ) शहापूरकर यांनी एपीएमसी भाजी मार्केट अस्तित्वात असताना मागील भाजप सरकारने खाजगी भाजी मार्केट स्थापन करण्याचा घाट घातला. त्यासाठी सरकारमधील स्थानिक आमदारांनी सहकार्य करून पुणे -बेंगलोर महामार्गा शेजारी खाजगी भाजी मार्केट उभे केले. मात्र हे मार्केट स्थापन करताना महानगरपालिका आणि जिल्हाधिकारी कार्यालयाकडून चुका झाल्या आहेत. या मार्केटच्या स्थापनेत गैरव्यवहार झाला आहे. त्याची चौकशी करून दोषींवर कारवाई करावी आणि शहरातील बेकायदेशीर खाजगी भाजी मार्केट रद्द करावे अशी आमची मागणी आहे, असे सांगितले.
एपीएमसी भाजी मार्केट व्यापारी संघटनेतर्फे महापालिका आयुक्तांना सादर करण्यात आलेल्या निवेदनाची प्रत राज्याचे मुख्यमंत्री, महसूल मंत्री, शहर विकास मंत्री, प्रादेशिक आयुक्त आदींना धाडण्यात आली आहे.
मनपा आयुक्तांनी व्यापाऱ्यांनी निवेदनात खाजगी भाजीमार्केटला बेकायदेशीर रित्या परवानगी देण्यात आल्याचे नमूद करण्यात आले असून हा तिढा सोडविण्यासाठी महसूल विभाग, शहर विकास प्राधिकरण आणि महानगरपालिकेच्या संयुक्त विद्यमाने एक पथक स्थापन करण्यात येईल. खाजगी भाजीमार्केट्ची जागा, भाजीमार्केटला देण्यात आलेली परवानगी यासह या भाजीमार्केट संदर्भात असलेल्या उणिवा तपासण्यात येतील. तपासणीअंती नियमानुसार योग्य तो क्रम घेण्यात येईल, असे अशोक दुडगुंटी यांनी स्पष्ट केले.
एपीएमसी गाळेधारक झाले पुन्हा आक्रमक,खाजगी होलसेल भाजी मार्केट बंद करा,मनपा समोर निदर्शन |BELGAUM LIVE| pic.twitter.com/7d7840hzjZ
— Belgaumlive (@belgaumlive) July 7, 2023
