बेळगाव लाईव्ह : कुठलीही महिला विशिष्ट क्षेत्रात कार्य करीत असताना तिला अनेक आव्हानांना सामोरे जावे लागते. अनेक अडचणी आणि समस्यांवर मात करावी लागते. अनेक महिला आपल्या जिद्दीने कणखर प्रवास साधत यशाचा मार्ग गाठतात.
जिद्द आणि मेहनतीच्या जोरावर समाजात विशिष्ट स्थान प्राप्त करतात. ग्रामीण भाग असो किंवा शहरी आज प्रत्येक भागातील महिला सुधारणेच्या दिशेने प्रवास करत आहेत. जिद्द आणि कष्टाच्या जोरावर कंग्राळी खुर्द येथील रोहिणी पाटील यांनीही असाच प्रवास साधत प्रवासाच्या क्षेत्रातील महत्वपूर्ण कामगिरी बजावणाऱ्या वाहन चालकाचे काम स्वीकारले आहे.
मूळच्या गडहिंग्लज तालुक्यातील सांबरे गावच्या रोहिणी रानबा पाटील यांचे सासर चंदगड तालुक्यातील मलतवाडी येथे आहे. कामानिमित्ताने बेळगावमध्ये वास्तव्यास असलेल्या रोहिणी पाटील या गेली ८ वर्षे बेळगावमधील वेगा हेल्मेट फॅक्टरीमध्ये काम करत आहेत. या फॅक्टरीमध्ये अनेक महिला आज काम करत आहेत. या महिलांना सुरक्षितरित्या त्यांच्या घरापासून ते कंपनीपर्यंत ने-आण करण्यासाठी विशेष वाहनांची सोय करण्यात आली आहे.
हि जबाबदारी सांभाळणारे आनंद कबाडगी यांच्याकडून प्रशिक्षण घेऊन सुरुवातीला कार आणि त्यानंतर हळूहळू मिनी बस चालविण्याचे प्रशिक्षण घेऊन रोहिणी पाटील यांनी सर्व महिलांना आपल्या जोखमीवर कंपनीत घेऊन जाण्याची जिद्द बाळगली. इतरांपेक्षा वेगळं काहीतरी करण्याचे ध्येय मनात बाळगून आज महिला दिनानिमित्ताने त्यांनी आपल्या नव्या प्रवासाची सुरुवात केली. गेल्या ७ -८ महिन्यांपासून वाहन चालविण्याचे प्रशिक्षण घेणाऱ्या रोहिणी पाटील यांना त्यांचे सासू-सासरे भागुबाई आणि शट्टूप्पा पाटील, पती रानबा पाटील, आई-वडील सुमन आणि बाबुराव खोराटे यांची मोलाची साथ लाभल्याचे त्या सांगतात.
आपल्या मनाशी निश्चय पक्का करून इतके मोठे आव्हान पेलण्यासाठी रोहिणी पाटील यांनी तयारी दर्शविली.दुचाकी आणि चारचाकी चालविणे या प्रत्येकासाठी आज सहजसोप्या गोष्टी बनल्या आहेत. मात्र अनेक प्रवाशांची जोखीम घेऊन मोठे वाहन चालविणे हे तसे जिकिरीचे काम आहे. वेगा हेल्मेट फॅक्टरी याठिकाणी कार्य करणाऱ्या आणि येथील महिलांना त्यांच्या घरापासून कंपनीत आणि कंपनीतून घरात आणून सोडायची जबाबदारी रोहिणी पाटील यांनी घेतली आहे. 
महिला दिनाचे औचित्य साधून कंग्राळी खुर्द येथील छत्रपती शिवाजी महाराजांच्या मुर्तीसमोरून त्यांनी आज आपल्या नवीन प्रवासाला सुरुवात केली असून त्यांच्या जिद्दीचे आणि निर्णयाचे महिलावर्गातून कौतुक आहे.
