बेळगाव लाईव्ह : येळ्ळूर राजहंसगडावरील विकासकाम आणि याठिकाणी प्रतिष्ठापना करण्यात आलेल्या छत्रपती शिवाजी महाराजांच्या मूर्ती अनावरण सोहळ्यावरून मोठा पेच निर्माण झाला असून एकीकडे राजहंसगडाचा विकास आपण केला असे सांगणाऱ्या आमदार लक्ष्मी हेब्बाळकर यांना भाजप नेत्यांनी शह देत विकासकामासाठी सरकारने निधी मंजूर केल्याचा दावा केला.
या वादात गोकाकचें आमदार आणि हेब्बाळकरांचे राजकीय विरोधक रमेश जारकीहोळी यांनी उडी घेत राजहंसगडावरील विकासकामांचे उद्घाटन आणि शिवाजी महाराजांच्या मूर्तीचे अनावरण शासकीय शिष्टाचारानुसारच व्हावे असा रेटा लावला. आणि अखेरीस २ मार्च रोजी राजहंसगडावर शासकीय शिष्टाचारानुसार कार्यक्रम आयोजित केला गेला.
उद्या (गुरुवारी) मुख्यमंत्री बसवराज बोम्मई यांच्याहस्ते राजहंसगडावरील शिवाजी महाराजांच्या मूर्तीचे अनावरण होणार असून शासकीय कार्यक्रमात लक्ष्मी हेब्बाळकर यांना अध्यक्षस्थान देण्यात आले आहे. त्यामुळे या कार्यक्रमास आम. हेब्बाळकर उपस्थित राहणार का? याची उत्सुकता सर्वांना लागली आहे.
या कार्यक्रमास पालकमंत्री गोविंद कारजोळ, धर्मादाय खात्याच्या मंत्री शशीकला जोल्ले, कन्नड व संस्कृती खात्याचे मंत्री सुनीलकुमार तसेच जिल्ह्यातील सर्व खासदार, आमदार व महामंडळांचे अध्यक्ष उपस्थित राहणार आहेत. जिल्हा प्रशासन व कन्नड संस्कृती खात्याकडून मंगळवारी या कार्यक्रमांची निमंत्रण पत्रिका प्रसिद्ध करण्यात आली आहे. त्यामुळे आता २ मार्चला पुतळा अनावरण कार्यक्रम होणार हे नक्की झाले आहे.
राजहंसगड येथील छत्रपती शिवाजी महाराजांच्या पुतळ्याचे अनावरण ५ मार्चला करण्याचा निर्णय आमदार लक्ष्मी हेब्बाळकर यांनी घेतला होता. मात्र याला भाजपने आक्षेप घेतला.
यामध्ये प्रामुख्याने रमेश जारकीहोळी यांनी आडकाठी केल्यामुळे पालकमंत्र्यांनी स्वतःच राजहंसगडावर २ मार्च रोजी शासकीय पद्धतीनुसार कार्यक्रम होईल, असे जाहीर केले.
राजहंसगडावरील कार्यक्रमासंदर्भात आमदार लक्ष्मी हेब्बाळकर यांनी ठिकठिकाणी बॅनर लावले असून श्रेयवादावरून सुरु झालेल्या राजकारणात भाजपने उडी घेतल्याने आता भविष्यात यावरून वाद ओढवण्याची शक्यता आहे.
