बेळगाव शहरातील कला मंदिरच्या जागेतील बहुउद्देशीय व्यापारी संकुलासह विविध विकास कामे अद्याप अपूर्ण असली तरी केंद्रीय नगर विकास खात्याने डेडलाईन दिल्यामुळे बेळगावची बहुचर्चित स्मार्ट सिटी योजना येत्या 30 जून 2023 मध्ये बंद होणार आहे.
बेळगाव स्मार्ट सिटी योजना बंद होण्याआधी स्मार्ट सिटीमधील सर्व कामांचे हस्तांतरण महापालिका तसेच संबंधित अन्य शासकीय विभागाकडे केले जाईल. स्मार्ट सिटी योजनेसाठी केंद्र व राज्य शासनाकडून एकूण 930 कोटी रुपये बेळगावला मंजूर झाले आहेत. त्यापैकी 804 कोटींचा निधी खर्च झाला आहे. स्मार्ट सिटी योजनेअंतर्गत 103 कामे हाती घेण्यात आली होती. त्यापैकी 75 होऊन अधिक कामे पूर्ण झाली असून उर्वरित शिल्लक कामे 30 जूनपूर्वी पूर्ण करावी लागणार आहेत. शहरात स्मार्ट सिटी योजनेतील जी विकास कामे ‘बांधा, वापरा व हस्तांतरित करा’ या तत्त्वावर सुरू आहेत. ती कामे 30 जून नंतर पूर्ण करण्याची मुभा आहे. मात्र स्मार्ट सिटी योजनेतील निधीतून सुरू असलेली कामे 30 जून पूर्वी पूर्ण करावी लागणार आहेत.
स्मार्ट सिटी निधीतील कामांपैकी कलामंदिरच्या जागेतील व्यापारी संकुलाचे काम पूर्ण करण्याचे आव्हान स्मार्ट सिटी विभागासमोर आहे. याशिवाय मंडोळी स्मार्ट रोडचे काम हे पूर्ण करावे लागणार असून व्हॅक्सिन डेपोतील हेरिटेज पार्क, ग्रामीण जीवनाची प्रतिकृती, एव्हिएशन पार्क, आर्ट गॅलरी वगैरे कामे सुरूच आहेत.
न्यायालयाच्या स्थगिती आदेशामुळे ही कामे वर्षभर थांबली होती. त्यामुळे ही कामे 30 जूनच्या आधी पूर्ण होतील का? हा प्रश्न आहे. बेळगाव स्मार्ट सिटीची योजना 25 जून 2016 रोजी सुरू झाली ती जून 2021 मध्ये पूर्ण करणे आवश्यक होते.
मात्र ती लांबत गेली आता केंद्रीय नगर विकास खात्याने ही योजना पूर्ण करण्यासाठी 30 जून 2023 ची डेडलाईन दिली आहे.
