केंद्र सरकारकडून स्वच्छ सर्वेक्षणांतर्गत देशभरातील शहरांना तारांकित दर्जा दिला जाणार असून त्यात बेळगाव शहरात ‘थ्री स्टार’ दर्जा मिळावा यासाठीचा प्रस्ताव महापालिकेकडून धाडण्यात आला आहे.
केंद्र सरकारच्या स्वच्छ सर्वेक्षण मोहिमेमध्ये बेळगाव महापालिका 2017 सालापासून सहभागी होत आहे. याआधी स्वच्छ सर्वेक्षणकडून केवळ गुण दिले जात होते. त्या आधारे सहभागी झालेल्या शहरांचे देशातील स्थान निश्चित केले जात होते. तथापि आता केंद्राकडून कांही निकषांवर तारांकित दर्जाही दिला जात आहे.
थ्री स्टार दर्जा मिळण्यासाठी जे निकष निश्चित करण्यात आले आहेत ते निकष बेळगाव महापालिकेकडून पूर्ण झाल्याचा महापालिकेच्या आरोग्य विभागाचा दावा आहे. त्यामुळेच बेळगाव महापालिकेला हा दर्जा मिळावा अशी मागणी करणारा प्रस्ताव पाठविण्यात आला आहे. परंतु स्वच्छ सर्वेक्षण अंतर्गत पाहणीसाठी किंवा पडताळणीसाठी येणाऱ्या पथकाकडून मूल्यमापन केले जाणार आहे.
केंद्र शासनाने निश्चित केलेले निकष महापालिकेने पूर्ण केल्याचे या पाहणीत किंवा पडताळणीत निश्चित झाले तरच पथकाकडून तशी शिफारस केली जाईल. त्यानंतरच बेळगावला ‘थ्री स्टार’ दर्जा मिळू शकेल. स्वच्छ सर्वेक्षण अंतर्गत पहिल्या टप्प्यातील पाहणी पार पडली असून पुढील दोन टप्प्यातील पाहणी पूर्ण झाल्यानंतर अंतिम निर्णय दिला जाईल. स्वच्छ सर्वेक्षणामध्ये बेळगावची कामगिरी आजवर समाधानकारक राहिलेली नाही.
देशभरातील ज्या शहरांकडून या सहभाग घेतला जातो. त्यातील पहिल्या 100 शहरांमध्ये बेळगावला स्थान मिळावे यासाठी महापालिकेकडून आजवर प्रयत्न केले गेले आहेत, पण ते यशस्वी ठरलेले नाहीत. दरम्यान, गेल्या 2021 -22 या वर्षात देशभरातील 382 शहरांनी स्वच्छ सर्वेक्षण मध्ये सहभाग घेतला होता. त्यात बेळगावला 171 वे स्थान मिळाले आहे. तसेच राज्यात बेळगावला 7 वे स्थान प्राप्त झाले आहे.
