बेळगाव लाईव्ह विशेष : बेळगावमधील बहुतांशी नागरिकांचा पशुपालन व्यवसाय आहे. याचबरोबर बेळगावमध्ये भटक्या जनावरांचीही संख्या अधिक आहे. ज्या जनावरांना कुणी वाली नाही अशी कुत्री, मांजरे, पाळीव डुक्कर, गायी-म्हशी शहर-परिसरात मोठ्या संख्येने वावरताना दिसत आहेत.
गेल्या दोन वर्षात भटक्या कुत्रांमुळे अनेक अनुचित प्रकार घडले आहेत. वाहनचालकांचा पाठलाग करणे, नागरिकांवर आणि प्रामुख्याने लहान मुलांवरील कुत्र्यांनी हल्ला केल्याचे प्रमाण अधिक आहे. शहर परिसरात अनेक छोट्या छोट्या गल्ल्या आहेत. या गल्ल्यांमधून मार्गस्थ होताना भटक्या कुत्र्यांचा उपद्रव सोसावा लागत आहे. कुत्र्यांनी चावा घेण्याचे अनेक प्रकारही वाढले असून अनेक ठिकाणी डुक्करांचीहि झुंडच्या झुंड रस्त्यावरून फिरताना दिसते.
गेलीच अशा या प्राण्यांमुळे रस्त्यावर घाणीचे साम्राज्य पसरते. अनेकजण कुत्री-मांजराप्रमाणे डुक्करांचेही पालन करतात. आणि या पाळीव जनावरांच्या नैसर्गिक विधीसाठी त्यांचे मालक राजरोसपणे त्यांना रस्त्यावर घेऊन येतात. यामुळे आधीच भटक्या जनावरांचा उपद्रव सोसत असलेल्या नागरिकांना पाळीव जनावरांचाही उपदव्याप सहन करावा लागत आहे.
जनावरांवरदेखील अनेक रोगांची लागण झालेली आपण पाहत आहोत. प्राण्यांच्या माध्यमातून माणसापर्यंतही रोगाचा संसर्ग होत असल्याची उदाहरणे आपल्यासमोर आहेत. भटक्या जनावरांना तर अशा रोगांची शक्यता अधिक असते. मात्र वारंवार या समस्येबाबत मनपाचे लक्ष वाढूनही आजतागायत मनपाने हि समस्या निवारण्यासाठी पुढाकार घेतला नाही. याउलट हि समस्या अधिकाधिक वाढत चालली आहे. कुत्र्यांची नसबंदी मोहीम राबविण्यात मनपाला अपयश आले आहे.
नागरिकांना भटक्या आणि मोकाट जनावरांमुळे सोसावा लागणारा त्रास लक्षात घेऊन मोकाट जनावरांच्या व्यवस्थापनासंदर्भात मनपाने पुढाकार घेणे आवश्यक आहे. वेळोवेळी कर भरणाऱ्या नागरिकांना नागरी सुविधा योग्य रीतीने पुरविणे हे मनपाचे कर्तव्य आहे. कुत्र्यांची नसबंदी, डुक्कर मालकांना तसेच पाळीव कुत्रा पाळणाऱ्या मालकांना छाप, भटकी जनावरे पंजरमोळ अथवा जंगलात सोडणे हि सर्व मनपाची जबाबदारी आहे.
मनपाने याबाबत वेळीच शहाणपण दाखविणे अत्यंत आवश्यक आहे अन्यथा असाध्य रोगाचा संसर्ग वाढल्यास ‘बैल गेला नि झोपा केला’! असा प्रकार झाल्यास नागरिकांचा रोष मनपा आणि प्रशासनाला झेलावा लागेल.
