बेळगाव लाईव्ह : विधानसभा निवडणुकीच्या भाजपच्या तयारीचा आढावा घेण्यासाठी केंद्रीय गृहमंत्री अमित शहा 27 आणि 28 जानेवारीला पुन्हा राज्याच्या दौऱ्यावर येत आहेत.
पक्षातील सूत्रांनी दिलेल्या माहितीनुसार, अमित शाह यावेळी हुबळी आणि बेळगावला भेट देणार आहेत. दि. 28 जानेवारी रोजी ते कित्तूर मतदार संघाला भेट देणार आहेत. राज्यातील प्रमुख नेत्यांशी चर्चा करण्यासोबतच ते बेळगाव येथे जाहीर सभा घेण्याची शक्यता आहे.
डिसेंबरच्या अखेरीस राज्याच्या दौऱ्यादरम्यान त्यांनी बेंगळुरू, मंड्या आणि बंगळुरू ग्रामीण जिल्ह्यांना भेट दिली होती.
महिनाभरातील त्यांचा हा दुसरा राज्य दौरा आहे. एम. के. हुबळी येथेही असेच कार्यक्रम आखण्यात आले असून ज्याठिकाणी अमित शहा उपस्थित राहणार आहेत, त्याठिकाणच्या परिसराची पाहणी कित्तूरचे आमदार महांतेश दोड्डगौडर यांनी केली आहे.
अमित शहा यांचा दौरा आगामी निवडणुकीसंदर्भात प्रादेशिक आणि जिल्हा स्तरावर सूक्ष्म व्यवस्थापनाचा अवलंब करण्यासाठी केला जात असल्याची चर्चा राज्यातील भाजप नेत्यांमध्ये सुरु आहे.
