जातीवाचक शिवीगाळ करणाऱ्या संपतकुमार देसाई यांच्यावर कारवाई करण्यात यावी, अशी मागणी करत दलित संघर्ष समितीने शनिवारी डॉ. बाबासाहेब आंबेडकर गार्डन पासून जिल्हाधिकारी कार्यालयापर्यंत निषेध मोर्चा काढून निदर्शने केली.
संपतकुमार देसाई यांच्यावर कारवाई करण्यात यावी, या मागणीचे निवेदन जिल्हाधिकाऱ्यांना सादर केले तसेच गोगटे महाविद्यालयात झालेल्या कन्नड ध्वज प्रकरणातील विद्यार्थ्यांना पाठिंबा दर्शविला.
गोगटे महाविद्यालयात शिक्षण घेणाऱ्या तुरमुरी येथील दलित विद्यार्थ्याला जातीवाचक शिवीगाळ करण्यात आली असून महाविद्यालयात आयोजित करण्यात आलेल्या कार्यक्रमात हा प्रकार घडला आहे.
अशा घटनांची वारंवार पुनरावृत्ती होत असून हा प्रकार थांबविण्यात यावा, तसेच कन्नड – मराठी भाषिकांमध्ये तेढ निर्माण करण्यासाठी जाणीवपूर्वक हा प्रकार घडवून आणण्यात आला असून कन्नड ध्वजाचा मुद्दा पुढे करून खोटा गुन्हा दाखल केल्याचा आरोप आंदोलनकर्त्यांनी केला.
संपतकुमार देसाई यांच्यासह त्यांच्या साथीदारांवर योग्य ती कायदेशीर कारवाई करण्यात यावी, तसेच उर्वरित विद्यार्थ्यांचे भवितव्य उद्ध्वस्त होणार नाही, याची काळजी घ्यावी, अशी मागणीही करण्यात आली. सदर मागणी पूर्ण न झाल्यास तीव्र आंदोलन छेडण्यात येईल, असा इशारा आंदोलकांनी दिला.
यावेळी सिद्धाप्पा कांबळे, मल्लेश चौगुले, महांतेश तलवार, रमेश कोलकार, राजप्पा कांबळे, संतोष कांबळे आदी उपस्थित होते.
