महाराष्ट्रातील नेत्यांना येऊ नका असे आवाहन करा, अशा पोलीस अधिकाऱ्यांनी केलेल्या विनंतीस अप्रत्यक्ष नकार देताना आम्ही आमचा मेळावा शांततेत पार पाडतो. पोलीस प्रशासनाने फक्त आम्हाला सर्वतोपरी सहकार्य करावे, असे मध्यवर्तीय महाराष्ट्र एकीकरण समितीतर्फे आज गुरुवारी पोलीस प्रशासनासोबत झालेल्या बैठकीत स्पष्ट करण्यात आले.
महाराष्ट्र एकीकरण समितीच्यावतीने सोमवार दि. 19 डिसेंबर 2022 रोजी आयोजित महामेळाव्यासंदर्भात चर्चा करण्यासाठी पोलीस अधिकारी
आणि म. ए. समिती पदाधिकाऱ्यांची बैठक आज गुरुवारी सकाळी सहाय्यक पोलीस आयुक्त चंद्रप्पा यांच्या कार्यालयात पार पडली होती. बैठकीच्या अध्यक्षस्थानी कायदा व सुव्यवस्था विभागाचे पोलीस उपायुक्त रवींद्र गडादी हे होते. त्यांनी समिती समितीच्या पदाधिकाऱ्यांकडून मेळाव्याबाबत माहिती घेतली.
मेळाव्यासाठी महाराष्ट्रातील विविध पक्षांच्या अध्यक्षांना पत्रे लिहिली असून जे नेते येतील त्यांच्याबद्दल आम्ही कळवू शिवाय गृहमंत्री अमित शाह यांनी महाराष्ट्र -कर्नाटकातून नेत्यांना अटकाव करू नये असे म्हंटल्याचे पदाधिकाऱ्यांनी यावेळी सांगितले.
त्यावर महाराष्ट्रातील नेत्यांना येऊ नका असे आवाहन करा, अशी विनंती पोलीस अधिकाऱ्यांनी केली. त्याला अप्रत्यक्ष नकार देताना आम्ही आमचा मेळावा शांततेत पार पाडतो. मात्र पोलीस प्रशासनाने सर्वतोपरी सहकार्य करावे, अशी विनंती समितीच्या पदाधिकाऱ्यांनी केली.
बैठकीस मध्यवर्तीय महाराष्ट्र एकीकरण समितीचे कार्याध्यक्ष माजी आमदार मनोहर किणेकर, सरचिटणीस माजी महापौर मालोजी अष्टेकर, उपाध्यक्ष ॲड. राजाभाऊ पाटील, चिटणीस रणजित चव्हाण-पाटील, तालुका म. ए. समितीचे सरचिटणीस एम.जी.
पाटील, समितीचे जनसंपर्कप्रमुख विकास कलघटगी, मार्केट उपविभागाचे सहाय्यक पोलीस आयुक्त नारायण बरमणी, खडेबाजार उपविभागाचे सहाय्यक पोलीस आयुक्त चंद्रप्पा, खडेबाजार पोलीस ठाण्याचे पोलीस निरीक्षक दिलीप निंबाळकर आणि टिळकवाडी पोलीस ठाण्याचे पोलीस निरीक्षक उपस्थित होते.
