दर्जेदार शिक्षण देण्यासाठी राष्ट्रीय शैक्षणिक धोरण अत्यंत महत्त्वाची भूमिका बजावत असल्याने पुढील शैक्षणिक वर्षापासून राज्यात त्यातील सर्व बाबींची अंमलबजावणी केली जाईल, अशी घोषणा प्राथमिक व माध्यमिक शिक्षण खात्याचे मंत्री बी. सी. नागेश यांनी केली आहे.
शालेय शिक्षण आणि साक्षरता विभाग कर्नाटक सर्व समावेशक शिक्षण विभागातर्फे बेंगलोर येथे आयोजित कार्यक्रमात ते बोलत होते. राष्ट्रीय शैक्षणिक धोरण लागू झाल्यानंतर शिक्षणात अनेक सुधारणा होणार असल्यामुळे कर्नाटकातही त्याची अंमलबजावणी करण्याचा निर्णय घेतला आहे.
राष्ट्रीय शैक्षणिक धोरण 2020 च्या कन्नड आवृत्तीच्या प्रती सर्व शिक्षकांना प्रदान केल्या आहेत. शिक्षणाच्या मूलभूत स्तरासाठी 3 ते 8 वर्षे वयोगटातील मुलांसाठी राष्ट्रीय अभ्यासक्रम आराखडा प्रसिद्ध केला असून त्याचे कन्नडमध्ये भाषांतर करण्यासाठी आवश्यक पावले उचलण्यात आले आहेत, असे शिक्षण मंत्र्यांनी सांगितले.
राष्ट्रीय शैक्षणिक धोरण 2020 मूलभूत स्तरावर 2023 -24 पासून अंमलात आणण्यासाठी पावले उचलली जात आहेत. स्थानिक पातळीवर विकसित खेळणी, स्थानिक कथा, पौराणिक कथा, विविधता यांचा समावेश असलेल्या
राज्य अभ्यासक्रमाची चौकट तयार केली जाणार आहे असे सांगून विद्यार्थ्यांचे भविष्य घडविण्यात शिक्षकांची भूमिका महत्त्वाची असून त्यांनी स्थानिक भाषा विकसित करण्याचे काम केले पाहिजे, असेही शिक्षण मंत्री बी. सी. नागेश यांनी स्पष्ट केले.
