बेळगाव शहराची वाढती प्रगती लक्षात घेऊन बेळगाव ते बेंगलोर हाय स्पीड ‘वंदे भारत एक्सप्रेस रेल्वे’ सुरू करण्यात यावी, अशी मागणी बेळगावच्या खासदार मंगला अंगडी यांनी केंद्रीय रेल्वेमंत्री अश्विनी वैष्णव यांच्याकडे केली आहे.
खासदार मंगला अंगडी यांनी नवी दिल्ली मुक्कामी केंद्रीय रेल्वेमंत्री अश्विनी वैष्णव यांची भेट घेऊन उपरोक्त मागणीची निवेदन त्यांना सादर केले. बेळगाव शहरासह जिल्ह्याची वेगाने प्रगती होत असून बेळगाव हे कर्नाटकची दुसरी राजधानी मानले जाते. त्यामुळे बेळगावला ये -जा करणाऱ्यांच्या संख्येमध्ये लक्षणे वाढ झाली आहे.
राज्यात अति वेगाने वाढणाऱ्या शहरांमध्ये बेळगावचे नाव असून दररोज हजार लोक बेंगलोरहून बेळगावला येत असतात. यासाठी रेल्वेच्या माध्यमातून बेळगाव -बेंगलोर दरम्यान हाय स्पीड रेल्वे सुरू करण्याची गरज आहे. यासाठी बेळगाव ते बेंगलोर हाय स्पीड वंदे भारत एक्सप्रेस रेल्वे सुरू करावी अशा आशयाचा तपशील निवेदनात नमूद आहे.
आपल्या भेटीप्रसंगी खासदार मंगला अंगडी यांनी बेळगाव शहराच्या नूतनीकरण करण्यात आलेल्या रेल्वे स्थानकाच्या उद्घाटनासाठी, तसेच नियोजित बेळगाव -कित्तूर -धारवाड रेल्वे मार्गाच्या भूमिपूजनासाठी पंतप्रधान नरेंद्र मोदी यांना निमंत्रित करण्यासंदर्भात रेल्वेमंत्री अश्विनी वैष्णव यांच्याशी चर्चा केली.
त्यावर रेल्वेमंत्र्यांनी लवकरच आपण पंतप्रधानाशी या विषयावर बोलणार असून वंदे भारत एक्सप्रेस रेल्वे सेवा सुरू करण्याचे आश्वासन दिले.
