बेळगाव चेंबर ऑफ कॉमर्स अँड इंडस्ट्रीज (बीसीसीआय) आणि बेळगाव जिल्हा लघुउद्योग संघटना (बीडीएसएसआयए) यांनी आज शनिवारी कर सल्लागारां समवेत राज्य जीएसटी खात्याच्या संयुक्त आयुक्तांची भेट घेऊन चर्चा केली.
सदर संघटनांकडे त्यांच्या व्यापार आणि औद्योगिक क्षेत्रातील सभासदांकडून ई -वे बिल संबंधीत जीएसटी परताव्या मधील तफावतीसह जीएसटी करा संबंधी अन्य बऱ्याच तक्रारी आल्या आहेत.
या संदर्भात बीसीसीआय आणि बीडीएसएसआयए या संघटनांच्या पदाधिकाऱ्यांनी आज जीएसटीच्या संयुक्त आयुक्तांची भेट घेतली. जीएसटीचे कांही अधिकारी जाणीवपूर्वक बाजारपेठेत भेटी देऊन व्यापाऱ्यांना नोटीसा देत आहेत. तेंव्हा कृपया या पद्धतीने व्यापार आणि औद्योगिक क्षेत्रातील लोकांना त्रास दिला जाऊ नये, अशी विनंती यावेळी करण्यात आली.
तसेच व्यापारी आणि उद्योजकांच्या समस्या निवारण्यासाठी या दोन्ही क्षेत्रातील लोकांसह राज्य जीएसटी अधिकाऱ्यांची चेंबर ऑफ कॉमर्स अँड इंडस्ट्रीजच्या सभागृहात बैठक बोलवावी, अशी सूचना यावेळी बीसीसीआयच्या अध्यक्षांनी जीएसटी संयुक्त आयुक्तांना केली. याप्रसंगी दोन्ही संघटनांचे प्रमुख पदाधिकारी आणि कर सल्लागार उपस्थित होते.
