दीपावली सणासाठी नैऋत्य रेल्वेने यशवंतपुर -बेळगाव -यशवंतपुर दरम्यान सुपरफास्ट स्पेशल एक्सप्रेस सुरू करण्याचा निर्णय घेतला आहे. त्यानुसार उद्या दि. 21 रोजी आणि त्यानंतर दि. 22 व 26 ऑक्टोबर रोजी ही खास एक्सप्रेस रेल्वे सेवा उपलब्ध असणार आहे.
दिवाळी सणादरम्यान प्रवाशांची अतिरिक्त गर्दी कमी करण्यासाठी मागणीनुसार विशेष रेल्वेगाड्या चालविल्या जाणार आहेत. यासाठी यशवंतपुर -बेळगाव -यशवंतपूर सुपरफास्ट स्पेशल एक्सप्रेस 21, 22 व 26 ऑक्टोबर रोजी धावणार आहे.
यापैकी पहिल्या दोन दिवशी धावणाऱ्या रेल्वेंचा क्र. 06505 /06506 हा असणार आहे. रेल्वे क्र. 06505 एक्सप्रेस 21 आणि 22 ऑक्टोबर 2022 रोजी यशवंतपूर येथून रात्री 11:30 वाजता सुटेल आणि दुसऱ्या दिवशी सकाळी 9:25 वाजता बेळगाव येथे पोहोचेल. सदर एक्सप्रेस रेल्वे तुमकुर, आर्सीकेरी, चिक्कजाजूर, दावणगिरी, राणीबेन्नूर, हावेरी, हुबळी, धारवाड व लोंढा मार्गे बेळगावला येईल.
परतीच्या प्रवासासाठी रेल्वे क्र. 06506 बेळगाव -यशवंतपुर सुपरफास्ट स्पेशल एक्सप्रेस बेळगावहून 22 ऑक्टोबरला सकाळी 11:10 वाजता सुटेल आणि त्याच दिवशी रात्री 10 वाजता यशवंतपूर येथे पोहोचेल.
याखेरीज रेल्वे क्र. 07305 बेळगाव -यशवंतपुर सुपरफास्ट स्पेशल एक्सप्रेस (एक मार्गी) दि. 26 ऑक्टोबर रोजी रात्री 10 वाजता सुटेल आणि दुसऱ्या दिवशी सकाळी 8:50 वाजता यशवंतपूर येथे पोहोचेल. या रेल्वेत 1 एसी टू टायर, 7 एसी थ्री टायर, 7 स्लीपर क्लास आणि जनरेटर मोटारीसह दोन लगेच कम ब्रेक व्हेन असे 17 डबे असतील.
