नवरात्र उत्सव अवघ्या दोन दिवसावर येऊन ठेपला असून नवरात्र उत्सवाचे रंग भरण्यासाठी बेळगाववासीय सज्ज होताना दिसत आहेत. नवरात्र उत्सवाच्या पार्श्वभूमीवर घरोघरी स्वच्छता करण्याबरोबरच दांडिया कार्यक्रमांचे आयोजन,दौड यांची तयारी सुरू करण्यात आली आहे.यामुळे पुढील नऊ दिवसांमध्ये नवरात्र उत्सवाची धूम पाहायला मिळणार आहे.
नवरात्र उत्सवाच्या निमित्ताने बाजारपेठ देखील बहरल्या असून महिला वर्गासह तरुणाई तसेच बालचमूना आता नवरात्र उत्सवाचे वेध लागले आहेत. मागील दोन वर्षापासून कोरोनामुळे नवरात्र उत्सवाला मुरड घालावी लागली होती सार्वजनिक नवरात्र उत्सव मंडळातर्फे देखील कार्यक्रम आयोजित करण्यावर मर्यादा आल्याने नवरात्र उत्सवाचा उत्साह दुणावला होता. मात्र यंदा कोरोना कमी झाल्याने उत्सवाच्या पार्श्वभूमीवर जोरदार तयारी सुरू केली आहे
प्रामुख्याने नवरात्र उत्सवाची तयारी घरापासूनच सुरू होते घरात देव अर्थात घट बसवण्यात येतात.यामुळे घटस्थापनेसाठी म्हणून घरोघरी महिलावर्ग स्वच्छतेच्या कार्यात मग्न असल्याचे दिसून येत आहे. तर दुसऱ्या बाजूला तरुणाई कडून तसेच दांडियाच्या कार्यक्रमाची तयारी सुरू केली आहे. याबरोबरच दौड चा उत्साह देखील मोठ्या प्रमाणात असून सदर नऊ दिवसाच्या कालावधीत राबविण्यात येणारे कार्यक्रमांची पूर्वतयारी केली जात आहे.
कांगली गल्ली येथील एकता युवक मंडळाने देखील नवरात्र उत्सवाची जोरदार तयारी सुरू केली असून श्री नारायणी देवीच्या आगमनाची तयारी झाली आहे तिरूपती पद्मावती मंदिराचा शामियाना उभे करण्यात येत आहे.
विशेष करून नऊ दिवसात नऊ रंगाच्या साड्या परिधान करून महिला वर्ग नवरात्रीच्या कार्यक्रमात सहभागी होतात. विविध संस्था,संघातर्फे राबविण्यात येणारे महिला वर्गासाठीचे कार्यक्रम आणि यामध्ये सहभागी होण्यासाठी महिला तयारी करत असल्याचे दिसून येत आहे. विशेष करून बाजारपेठेत देखील नवरात्रीच्या निमित्ताने रंगबिरंगी टिपऱ्यांचे प्रदर्शनास भरले असून त्या ठिकाणी दांडिया खेळण्यासाठी आवश्यक असणाऱ्या पोशाखाची देखील मागणी वाढली आहे.
तसेच शहरातील मंदिरांमधून देखील घटस्थापनेच्या अनुषंगाने पूर्वतयारी केली जात आहे मंदिर स्वच्छतेबरोबरच विद्युत रोषणाईसाठी म्हणून लगबग सुरू आहे तसेच विविध मंदिरांसमोर मंडप उभारणी देखील करण्यात येत असल्याचे चित्र दिसून येत आहे यामुळे एकंदरीतच केवळ दोन दिवसावर म्हणजेच सोमवार दिनांक 26 रोजी होणाऱ्या घटस्थापनेसाठी बेळगाव शहरवासीय सज्ज होत असताना चे चित्र पाहायला मिळत आहे.
