वडगांव येथील सुप्रसिद्ध नवसाला पावणाऱ्या श्री मंगाई देवीचा यात्रोत्सव येत्या मंगळवार दि. 26 जुलै रोजी साजरा केला जाणार असल्याचे श्री मंगाई देवस्थान कमिटीच्यावतीने कळविण्यात आले आहे.
वडगाव येथील श्री मंगाई देवीची यात्रा दरवर्षी होत असते. या देवीचे लाखो भक्त असून यात्रेनिमित्त कर्नाटकसह महाराष्ट्र आणि गोवा राज्यातून शेकडो भक्त दरवर्षी श्री मंगाई देवीच्या दर्शनाला येत असतात. यात्रोत्सव शांततेत यशस्वी पार पडावा यासाठी प्रशासन आणि पोलिसांचे सहकार्य लाभत असते.
कोरोना प्रादुर्भावामुळे गेल्या दोन वर्षात सदर यात्रोत्सव झाला नव्हता. त्यावेळी सार्वजनिकरित्या ही यात्रा झाली नसली तरी घरोघरी हा यात्रोत्सव साजरा केला गेला होता.
मात्र आता कोरोना निवळल्यामुळे यंदाची श्री मंगाई देवी यात्रा मोठ्या प्रमाणात धुमधडाक्याने साजरी करण्यात येणार आहे. त्या अनुषंगाने श्री मंगाई देवस्थान कमिटीने जोरदार तयारीला सुरुवात केली आहे.
