हालगा -मच्छे बायपास रस्त्याच्या कामावरील स्थगिती आदेश उठवावा अशी अर्जाद्वारे राष्ट्रीय महामार्ग प्राधिकरणाने जिल्हा दिवाणी न्यायालयाकडे केलेली मागणी न्यायालयाने फेटाळून लावली आहे. याबाबत पुढील सुनावणी येत्या 27 जून रोजी होणार आहे.
हालगा -मच्छे बायपास रस्त्यासंदर्भात न्यायालयाने यापूर्वी जिल्हाधिकारी, प्रांताधिकारी व पोलिस आयुक्तांना कारणे दाखवा नोटीस बजावली होती. तसेच उच्च न्यायालयाने कांही दिवसांपूर्वी बायपास कामाला स्थगिती दिली होती.
त्यामुळे कामाला पूर्णपणे ब्रेक लागून शेतकऱ्यांना मोठा दिलासा मिळाला आहे. तथापी राष्ट्रीय महामार्ग प्राधिकरण हालगा -मच्छे बायपासच्या कामासाठी मोठ्या प्रमाणात खर्च करण्यात आला आहे असा दाखविण्याचा प्रयत्न करीत सदर काम पुन्हा सुरू करण्याची परवानगी देण्यात यावी यासाठी प्रयत्न करीत आहे. या संदर्भात राष्ट्रीय महामार्ग प्राधिकरणाने जिल्हा दिवाणी न्यायालयात दाखल केलेल्या अर्जावर काल सोमवारी सुनावणी झाली.
त्याप्रसंगी न्यायालयाने दोन्ही बाजू ऐकून घेत हालगा -मच्छे बायपास रस्त्याचे कोणतेही काम हाती घेऊ नये अशी स्पष्ट सूचना करत प्राधिकरणाची मागणी फेटाळली. त्यामुळे शेतकऱ्यांना पुन्हा एकदा दिलासा मिळाला आहे.
न्यायालयाने स्थगिती दिल्यामुळे प्राधिकरणाची मोठी गोची झाली आहे. आता पुन्हा एकदा स्थगिती उठविण्यासाठी त्यांच्या हालचाली सुरू झाल्या असल्या तरी बायपासचे काम पुन्हा सुरू होण्याची शक्यता कमी आहे.
